Тоқаев Қазақстанның ЕАЭО-ға төрағалық ету кезіндегі басымдықтарын айқындады, деп хабарлайды DKNews.kz.
Қазақстан Республикасының Президенті Қасым-Жомарт Тоқаев 2026 жылғы 1 қаңтардан бастап Қазақстанның Еуразиялық экономикалық одақ органдарына төрағалық етуіне байланысты интеграциялық дамудың негізгі басымдықтарын айқындап, ЕАЭО-ға мүше мемлекеттердің басшыларына үндеу жолдады.
Қазақстанның төрағалығы және интеграцияның жаңа кезеңінің міндеттері
Мемлекет басшысы өткен жыл Одақ үшін мерейлі жыл болғанын және оның дамуының екінші онжылдығына қадам басқанын атап өтті.
«Алдағы кезеңдегі ортақ міндетіміз – интеграцияның тиімділігін арттырып, ЕАЭО-ның әлеуеті мен сұранысқа ие болуын күшейту», – деп атап өтті Президент.
2026 жылдан бастап 2030 жылға дейін және 2045 жылға дейінгі кезеңге арналған «Еуразиялық экономикалық жол» стратегиялық декларациясын іске асыру басталады. Тоқаевтың айтуынша, бұл құжатқа басымдық беріледі.
Жасанды интеллект – еуразиялық интеграцияның драйвері
Президент алғашқы негізгі бағыт ретінде жасанды интеллектті атады.
«Әлем бұрын-соңды болмаған мүмкіндіктер ашатын, сонымен қатар жаңа сын-қатерлер туындататын жаңа тарихи дәуірге қадам басты», – деді ол.
Тоқаев Қазақстанның толыққанды цифрлық мемлекет болуды мақсат етіп отырғанын және Астанадағы Alem.ai орталығы мен Алатаудағы CryptoCity пилоттық аймағы сияқты бастамаларды жүзеге асырып жатқанын атап өтті.
«2026 жылы Астанада өтетін Еуразиялық экономикалық форум аясында ЕАЭО шеңберінде жасанды интеллектті жауапты дамыту жөніндегі Бірлескен мәлімдемеге қол қоюды ұсынамыз», – деді Президент.
ЕАЭО – Еуразияның логистикалық хабы
Екінші басымдық ретінде көлік-логистикалық әлеуетті дамыту белгіленді.
«Біздің ортақ мақсатымыз – құрлықтағы жетекші логистикалық хабқа айналу», – деп атап өтті Мемлекет басшысы.
Ол зияткерлік жүйелерді енгізудің, мультимодальды тасымалдарды дамытудың және «тігіссіз» логистика құрудың маңызын айтты. Қазақстан Smart Cargo пилоттық жобасын іске асырып, құжат айналымын электронды форматқа көшіруде.
Өнеркәсіп пен АӨК-тегі технологиялық серпіліс
Үшінші бағыт өнеркәсіп пен агроөнеркәсіптік кешенді цифрландыруға қатысты.
«Өнеркәсіп пен агроөнеркәсіптік кешен – ЕАЭО-ға мүше елдердің экономикалық негізі», – деді Президент.
Тоқаев қаржыландыруды серпінді инновациялық жобаларға бағыттау, стартаптарды, құзырет орталықтарын және демонстрациялық алаңдарды дамыту, сондай-ақ Еуразиялық экономикалық комиссия тарапынан қолдауды күшейту қажеттігін атап өтті.
Кедергісіз сауда – Одақтың негізгі қағидаты
Үндеуде әкімшілік кедергілерді жоюға ерекше назар аударылды.
«Сауда мен жекелеген салалардың дамуын тежейтін барлық жасанды шектеулер өткеннің еншісінде қалуы тиіс», – деді Президент.
Ол кедендік және өзге де бақылау шаралары қысым көрсету құралына айналмауы керек екенін және кедергісіз орта құру жөніндегі міндеттемелердің қатаң сақталуы тиіс екенін атап өтті. Ықтимал кедергілерді бақылау үшін жасанды интеллект технологияларын пайдалану ұсынылды.
Сауданың жаңа географиясы және жаһандық диалог
Бесінші басымдық сыртқы экономикалық күн тәртібіне арналды.
«ЕАЭО сыртқы серіктестермен экономикалық ынтымақтастықты одан әрі белсенді түрде кеңейтуі керек», – деді Тоқаев.
Ол 2025 жылы Моңғолия және Индонезиямен еркін сауда аймақтары туралы келісімдерге, сондай-ақ БАӘ-мен экономикалық әріптестік туралы келісімге қол қойылғанын еске салып, Ғаламдық Оңтүстік, Араб әлемі, Оңтүстік-Шығыс Азия және Африка елдерімен байланыстарды кеңейтудің әлеуетін атап өтті.
Даму жолындағы интеграция
Қорытындысында Президент экономикалық интеграцияның қолданбалы сипатын атап өтті.
«Экономикалық интеграция – ЕАЭО шеңберіндегі өзара іс-қимылдың нақты нәтижелерін қамтамасыз етуге арналған маңызды құрал», – деді ол.
Тоқаевтың айтуынша, Қазақстан төрағалық ету кезеңінде белгіленген күн тәртібін іске асыруға және Еуразиялық экономикалық одақтың ортақ әлеуетін нығайтуға барынша үлес қосуды көздейді.
