Смог бір күні жауап берсе ше? Ал түтінге тұншыққан шайхана бүкіл қаланың метафорасына айналса ше?
Алматыда ерекше жоба жарық көрді. «Таза әзілдер» экологиялық стендап емес, жай ғана шоу да емес. Бұл - алдымен күлдіріп, кейін ойға қалдыратын көркем мини-фильм. Юмор бір сәтте мазасыз сұраққа айналады: біз шын мәнінде немен тыныстап жүрміз?
Жобаны Almaty Air Initiative қоры, Almaty Central Standup Club және режиссер Қуаныш Бейсек бірігіп жасады.
Смогпен сұхбат, түтінге толы шайхана және жаңа жылдық антиутопия
Фильмдегі кейіпкерлер классикалық стендап сахнасында емес, әр алматылыққа таныс, бірақ сюрреалистік кеңістіктерде сөйлейді: тұманнан көз ашпайтын көшелерде, түтінге тұнған шайханада, ескі таксидің ішінде, тіпті автөкөліктің дөңгелектерінен жасалған шыршаның жанында.
Бұл - Алматының болашағы емес. Бұл - қазірдің өзінде сезілетін шындық.
«Бұл жай әзіл емес - сатира»
Жұлдыз Саулебекова, Almaty Air Initiative қорының атқарушы директоры:
«Біз ауа туралы тек статистикамен емес, күшті визуалды образдармен де сөйлескіміз келеді. “Таза әзілдер” - биылғы жылы ауа тақырыбын юмор арқылы көтерген екінші жобамыз. Сырттай бұл жай ғана жаңа жылдық шоу сияқты көрінеді. Бірақ шындығында - алматылықтарды толғандырған нәрселерді жинақтап, бұл тақырыпқа жаңа көзқарас ұсынудың бір жолы».
Креативті продюсер Қуаныш Бейсек:
«Бұл жобада біз классикалық әзілмен емес, сатирамен жұмыс істедік. Ол ауыр тақырыпты жеңілдетпей, одан қашпай айтуға мүмкіндік береді. Егер көрермен көргеннен кейін бір сәт ойланса - демек, мақсат орындалды».
Кімдер қатысты
- Талғат Тынымбай - смогпен «сөйлесетін» басты эпизод
- Руслан Тай - түтінге тұншыққан шайханада абсурдтан логика іздейді
- Дариға Билал - волонтер образында ұрпақ пен смог туралы ой қозғайды
- Ансаған - ескі таксидің ішінде жүйе жайлы философия жасайды
- Мұхтар Ерлан - Аяз ата кейпінде мазасыз мерекеге нүкте қояды
Премьера қашан өтті
«Таза әзілдер» премьерасы 30 желтоқсанда Almaty Central Standup Club YouTube арнасында жарияланды.
Бұл жай ғана күлкі үшін жасалған жоба емес. Бұл - қала туралы, жауапкершілік туралы және таңдаудың кімнің қолында екені жөніндегі әңгіме.
