Қарағанды облысының Кәсіпкерлер палатасы алаңында сауда қызметін реттеу саласындағы заңнамадағы өзгерістер мен әлеуметтік маңызы бар азық-түлік тауарларының (ӘМАТ) жаңартылған тізбесін қолдану мәселелеріне арналған кеңейтілген кеңес өтті, деп хабарлайды DKNews.kz.
Кездесуге өңір кәсіпкерлері, салалық мемлекеттік органдардың өкілдері қатысты. Онлайн форматта облыстың қала-аудандарынан 200-ден астам кәсіпкер талқылауға қосылды.
2026 жылдан бастап шекті баға болмайды
Кеңестің модераторы, ҚР Сауда және интеграция министрлігінің Қарағанды облысы бойынша Сауда және тұтынушылардың құқықтарын қорғау департаментінің басшысы Абзал Рахымбаев 2026 жылғы 1 қаңтардан бастап енгізілетін негізгі өзгерістерге тоқталды.
Оның айтуынша, осы күннен бастап жергілікті атқарушы органдар шекті бағаларды белгілемейді. Бағаға бақылау енді өндірушінің босату бағасынан немесе шартта көрсетілген жеткізушінің сатып алу бағасынан 15 пайыздан аспайтын сауда үстемесін сақтау арқылы жүзеге асырылады.
ӘМАТ тізбесі 31 атауға дейін кеңейді
Абзал Рахымбаевтың айтуынша, ҚР Сауда және интеграция министрінің 2025 жылғы 23 желтоқсандағы №362-нқ бұйрығына сәйкес әлеуметтік маңызы бар азық-түлік тауарларының тізбесі 31 атауға дейін кеңейтілген.
Бұл шешім уақытша сипатқа ие және:
- негізгі азық-түлік өнімдерінің қолжетімділігін қамтамасыз етуге
- баға белгілеудегі ашықтықты арттыруға бағытталған.
Сонымен қатар 2025 жылы сауда саласында жоспарлы және жоспардан тыс бақылау шаралары жүргізілгені, кейбір кәсіпкерлердің әкімшілік жауапкершілікке тартылғаны айтылды. Осыған байланысты бизнес өкілдеріне қолданыстағы талаптарды мұқият сақтап, түсінбеген тұстар бойынша уәкілетті органдарға жүгіну ұсынылды.
«Үй маңындағы дүкендер» ең осал топта
Талқылау барысында кәсіпкерлер ӘМАТ тізбесінің кеңеюі шағын бизнеске, әсіресе “үй маңындағы дүкендерге” айтарлықтай қысым түсіретінін жеткізді.
Бизнес өкілдерінің айтуынша, мұндай дүкендерде әлеуметтік маңызы бар тауарлардың үлесі 60–70 пайызға дейін жетеді. Ал электр энергиясы, салық, жалдау ақысы мен логистика шығындарының өсуі жағдайында 15 пайыздық үстеме рентабельділікті күрт төмендетіп отыр.
Ірі желілер мен шағын бизнес арасындағы алшақтық
Кәсіпкерлер тағы бір маңызды мәселені көтерді — сатып алу шарттарының тең еместігі. Олардың сөзінше, ірі сауда желілері өнімді төмен көтерме бағамен сатып алады, ал шағын бизнес сол тауарды қымбатырақ алуға мәжбүр. Соған қарамастан, сауда үстемесіне қойылатын талап барлығына бірдей.
Бизнестің ұсыныстары
Кәсіпкерлер тарапынан бірқатар ұсыныстар айтылды:
- сауда үстемесін саралау мүмкіндігін қарастыру
- бақылауды көтерме жеткізушілер деңгейінде күшейту
- шағын форматтағы дүкендердің ерекшелігін ескеру
Палатаның ұстанымы
Қарағанды облысының Кәсіпкерлер палатасының директоры Ернар Күлпейісов бизнестің әлеуметтік бағыттағы саясатты түсінетінін, алайда оның нақты экономикалық салдарына алаңдайтынын атап өтті.
Оның айтуынша, Палата кәсіпкерлердің барлық ұсынысын тіркеп, оларды уәкілетті мемлекеттік органдармен диалог аясында әрі қарай ілгерілететін болады. Сондай-ақ кәсіпкерлерге арналған түсіндіру жұмыстары мен кеңес беру тұрақты түрде жалғасады.
Кеңес қорытындысы бойынша Қарағанды облысының Кәсіпкерлер палатасы бизнестің жиынтық ұстанымын тиісті мемлекеттік органдарға жолдайтынын хабарлады.
