Қазақстанда жол-көлік оқиғаларын рәсімдеу біртіндеп цифрлық форматқа көшіп келеді. Бұрын апатқа ұшыраған жүргізушілер полиция шақырып, ұзақ күтетін, құжат жинап, сотқа дейін баратын. Ал қазір бұл процесті смартфон арқылы 15–20 минутта аяқтауға мүмкіндік бар. Мұндай мүмкіндікті Еуропротокол тетігі ұсынып отыр, деп хабарлайды DKNews.kz.
Бұл цифрлық шешім Қазақстанда үшінші жыл қатарынан жұмыс істеп келеді. Ол міндетті автосақтандыру полисі аясында жол-көлік оқиғаларын жеңілдетілген тәртіппен рәсімдеуге арналған және Сақтандыру төлемдеріне кепілдік беру қорының (СТКБҚ) бастамасымен әзірленген.
5 күн күтпей, кейде 2 күнде-ақ төлем алуға болады
Еуропротоколдың басты артықшылығы – уақыт үнемдеу. Жол-көлік оқиғасын рәсімдеу орта есеппен 15–20 минутты алады. Ал сақтандыру төлемі онлайн өтінім берілгеннен кейін 5 жұмыс күні ішінде жәбірленушінің шотына аударылады.
Сарапшылардың айтуынша, қазіргі таңда жеңілдетілген тәртіппен рәсімделген өтінімдердің шамамен 30 пайызы бойынша төлем 2 күннің ішінде жүзеге асып отыр. Бұл – бұрынғы стандартты рәсіммен салыстырғанда айтарлықтай жылдам нәтиже.
42 мың жүргізуші полиция шақырмай рәсімдеген
Еуропротокол өз тиімділігін іс жүзінде дәлелдеп үлгерді. Екі жыл ішінде 42 мың қазақстандық жүргізуші жол-көлік оқиғасын полиция мен соттың қатысуынсыз рәсімдеген.
Бұл тетік әсіресе Астана, Шымкент қалаларында және Ақтөбе облысында кеңінен қолданылады. Тіпті қосымшаның базасы кей сәттерде әдеттегіден ұзақ жүктелсе де, жүргізушілер стандартты тәртіпке қайта оралғаннан гөрі бірнеше минут күтуге дайын.
Сарапшылардың айтуынша, қосымшаның алғашқы жылы жаңа жүйеге қатысты сұрақтар көп болған. Ал қазір Еуропротокол жүргізушілер үшін қалыпты әрі түсінікті құралға айналған.
DTP.kz және SuperApp жүктемені азайтты
Еуропротоколдың танымал болуына DTP.kz платформасының іске қосылуы да әсер етіп отыр. Бұл әзірлеме жол-көлік оқиғаларын жедел рәсімдеуге арналған және SuperApp қосымшасына біріктірілген.
«Freedom Insurance» СК» АҚ басқарма төрағасы Азамат Керімбаевтың айтуынша, басқа сақтандыру компанияларында сақтандырылған жүргізушілер де SuperApp арқылы DTP.kz платформасында өтінім бере алады. Бұл сақтандырушыларға да, жол полициясына да түсетін жүктемені бірнеше есе азайтады.
Деректер автоматты түрде толтырылады
SuperApp ішіндегі DTP.kz Еуропротокол арқылы рәсімдеуді айтарлықтай жеңілдетті. Егер жүргізуші Freedom Insurance компаниясында сақтандырылған болса, оның көліктері туралы деректер ЖСН арқылы базаға алдын ала енгізілген.
Бұл апатты рәсімдеу кезінде де, кейін сақтандыру төлемін алу барысында да уақытты едәуір үнемдеуге мүмкіндік береді. Қосымша деректерді қайта-қайта енгізудің қажеті жоқ.
Енді КАСКО бойынша да төлем жасауға болады
Өткен жылдың соңында Freedom Insurance клиенттері үшін тағы бір маңызды жаңашылдық енгізілді. Енді Еуропротокол декларациясы негізінде КАСКО (ерікті автосақтандыру) бойынша да төлем алуға мүмкіндік бар.
Егер жүргізушінің Еуропротокол арқылы рәсімделген декларациясы және жол-көлік оқиғасы орнынан түсірілген фотосуреттері болса, осы құжаттар КАСКО полисі бойынша төлем жасауға жеткілікті.
Азамат Керімбаевтың айтуынша, Еуропротокол декларациясы мен фотоматериалдар жол полициясының ресми құжаттарына тең. Алаяқтық белгілері болмаса, осы деректердің негізінде КАСКО бойынша да төлем жүргізіледі.
Қандай өзгерістер күтіліп отыр
Сақтандырушылар Еуропротоколды одан әрі жетілдіруге болатын бірнеше бағытты атап отыр. Соның бірі – фотобақылауды видеобақылаумен алмастыру. Қазір өтінім беру кезінде бірнеше фото түсіру қажет, ал бейнежазба бұл процесті едәуір жеделдетуі мүмкін.
Тағы бір ұсыныс – залалдың шекті сомасын 200 АЕК-ке дейін арттыру. Қазіргі 100 АЕК жаңа көліктердің қымбат қосалқы бөлшектерін ескергенде жеткіліксіз болып отыр. Егер шек 200 АЕК-ке дейін өссе, өтінімдер саны көбейіп, полиция мен соттарға түсетін жүктеме азаяды.
Алаяқтықты болдырмау үшін видеоматериалдарды машиналық оқытуға негізделген арнайы бағдарлама тексеруі мүмкін. Бұл адам факторын барынша азайтады.
Сонымен қатар, жүргізушінің атына тіркелген барлық көліктер туралы деректерді мобильді азаматтар базасынан автоматты түрде жүктеу тетігін енгізу де ұсынылып отыр. Бұл рәсімдеу уақытын одан әрі қысқартады.
Қала қозғалысына да әсері бар
Сарапшылардың айтуынша, Еуропротоколдың әрі қарай дамуы барлық жол қозғалысына қатысушылар үшін тиімді. Апатты рәсімдеуге кететін уақыт қысқарады, сақтандыру төлемі жылдам алынады, жол полициясына түсетін жүктеме азаяды, ал қала ішіндегі көлік қозғалысы біршама жеңілдейді.
Бірнеше жыл ішінде Еуропротокол қағаз жүзіндегі реформа емес, нақты жұмыс істейтін цифрлық құрал екенін дәлелдеді.
