Алматыда қардың қалың түсуінен кейін қаланы тазалау жұмыстары күшейтілді. Түнгі уақытта Алматы қаласы әкімінің орынбасары Алмасхан Сматлаев аудан аумақтарын аралап, коммуналдық қызметтердің жұмысын жеке тексерді, деп хабарлайды DKNews.kz.
Объезд барысында магистральды көшелер, аула ішілік жолдар және қоғамдық көлік бағыттары қаралды. Қала басшылығы әсіресе түнгі уақытта атқарылып жатқан жұмыстарға назар аударды, себебі дәл осы мезгілде жолдарда көлік азайып, техниканың тиімді жұмыс істеуіне мүмкіндік туады.
Негізгі назар - аулалар мен әлеуметтік нысандарға
Тексеру кезінде аулалардағы арнайы техниканың жұмысы, әлеуметтік нысандарға кіреберістерді тазалау және жиналған қарды сыртқа шығару мәселелері басты назарға алынды. Кейбір аумақтарда қарды уақытылы шығару маңызды екені атап өтілді, өйткені тазаланған жолдардың қайтадан қар үйіндісіне айналмауы қажет.
Мердігер ұйымдар мен аудан әкімдіктеріне түнгі ауысымдарды күшейту, арнайы техниканың аулаларға кедергісіз өтуін қамтамасыз ету және тұрғындардан келіп түскен өтініштерге жедел әрекет ету тапсырылды.
Қала тәулік бойы тазаланады
Әкімдіктің мәліметінше, Алматыда коммуналдық қызметтер тәулік бойы жұмыс істеп жатыр. Қар тазалау жұмыстары тек негізгі көшелермен шектелмей, екінші деңгейлі жолдар мен аула ішілік аумақтарды да қамтиды.
Қаланы тазалау жұмыстары қардың салдары толық жойылғанға дейін жалғасады. Қала тұрғындарынан арнайы техниканың жұмысына түсіністікпен қарап, мүмкіндігінше жол жиегіне көліктерін қалдырмау сұралады.
Қысқы ауа райы қалалық қызметтер үшін кезекті сынақ болса да, билік өкілдері жағдай толық бақылауда екенін мәлімдеді.
