Приозерск қаласында жаңа спорт клубы өз жұмысын бастады. Мұнда балалар әртүрлі күрес түрлерімен, мини-футболмен және ауыр атлетикамен тегін шұғылдана алады, деп хабарлайды DKNews.kz.
Клубта бір уақытта 210 адамға дейін жаттығуға мүмкіндік бар. Мұнда мини-футбол, волейбол, баскетбол, дзюдо, қазақ күресі, самбо және ауыр атлетика үшін заманауи залдар жабдықталған. Балаларға арналған жаттығулар тегін жүргізіледі.
Ересектер үшін жаттығулар негізгі кестеден тыс, ақылы негізде ұйымдастырылмақ.
Қазіргі таңда спорт клубының штатында жаттықтырушылар, спорт нұсқаушылары және медицина қызметкерін қоса алғанда, шамамен 30 адам жұмыс істейді.
Приозерск қаласы әкімдігінің баспасөз қызметінің хабарлауынша, клубта спортпен айналысуды бастағысы келетіндерге әлі де жеткілікті бос орын бар. Секцияға жазылу үшін медициналық анықтама, ата-ананың өтініші, 3×4 өлшеміндегі фотосурет, сондай-ақ баланың туу туралы куәлігінің және ата-анасының немесе қамқоршысының жеке куәлігінің көшірмесі қажет.
Жаттығулардан бөлек, жаңа спорт клубында жарыстар өткізу де жоспарланған. Заманауи стандарттарға сай салынған кең залдар әртүрлі деңгейдегі чемпионаттар мен біріншіліктерді ұйымдастыруға мүмкіндік береді.
