Әуе рейсін орындау туралы шешім әрбір әуе кемесіне жеке қабылданады. Ұшар алдында бір мезгілде бірнеше маңызды шарттың орындалуы талап етіледі. Тек осы талаптардың барлығы толық сақталған жағдайда ғана әуе кемесіне ұшуға рұқсат беріледі, деп хабарлайды DKNews.kz.
FlyArystan әуекомпаниясы қауіпсіздік пен операциялық дайындықты әрдайым бірінші орынға қоятынын атап өтті. Бұл кей жағдайларда рейстің кешігуіне, ауыстырылуына немесе тоқтатылуына әкелуі мүмкін, алайда басты мақсат өзгермейді — жолаушылар мен экипаж үшін қауіпсіз ұшуды қамтамасыз ету. Әуекомпания бұл туралы өзінің ресми Telegram-арнасында кеңінен баяндады.
Қауіпсіздік - басты қағида
Әр рейс алдында:
- әуе кемесінің техникалық жарамдылығы;
- экипаждың дайын әрі рейске жіберілгені;
- ауа райының белгіленген нормалар шегінде болуы;
- әуежайдың қабылдау және жөнелтуге дайындығы;
- маршруттың әуе кеңістігінде расталған дәлізге ие болуы
сияқты талаптар толық тексеріледі. Осы факторлардың барлығы сәйкес келгенде ғана рейске рұқсат беріледі.
Ауа райы - маңызды, бірақ жалғыз себеп емес
Ұшуға қатысты шешім қабылдауда ауа райы жағдайлары үлкен рөл атқарады. Көріну деңгейі, желдің бағыты мен күші, тұман, жауын-шашын немесе мұздану бір әуе кемесі үшін қалыпты болса, екіншісі үшін шектеу болуы мүмкін.
Азаматтық авиация субъективті бағаға емес, нақты метеорологиялық деректер мен қатаң нормативтерге сүйенеді. Сонымен қатар бірдей ауа райында әртүрлі типтегі ұшақтардың ұшу және қону мүмкіндіктері де әрқалай.
Мысалы, кеңфюзеляжды Boeing 767 және тарфюзеляжды Airbus A320 немесе A321 ұшақтарының пайдалану сипаттамалары бірдей емес. FlyArystan тек Airbus A320 типті әуе кемелерін пайдаланады. Ал ұшуға қатысты түпкілікті шешімді Қазақстан Республикасының Азаматтық авиациясында ұшуды жүргізу қағидаларына сәйкес әуе кемесінің командирі қабылдайды.
Әуежайдың ерекшелігі де маңызды
Рейсті орындау туралы шешімге нақты әуежайдың инфрақұрылымы да әсер етеді. Кей әуежайларда:
- бір ғана ұшу-қону жолағы;
- шектеулі навигациялық жүйелер;
- таулы рельеф немесе тығыз қалалық құрылыс болуы мүмкін.
Мұндай жағдайда ұшу мен қону тек белгілі бір бағытта жүзеге асырылады. Егер сол бағыттағы жел немесе көріну деңгейі талапқа сай болмаса, рейс ауа райының жақсаруын күтеді, қосалқы әуежайға бағытталады немесе уақытша кейінге шегеріледі.
Мысалы, Шымкент әуежайында қонуға қойылатын ауа райы минимумы салыстырмалы түрде жоғары, сондықтан кейбір жағдайларда белгілі бір бағыт бойынша қону уақытша мүмкін болмауы ықтимал.
Экипаж бен операциялық факторлар
Күрделі рельефі бар немесе таулы аймақта орналасқан әуежайларға ұшу үшін экипаж мүшелерінің арнайы рұқсаттары мен дайындықтары болуы қажет. Рейстерді жоспарлау кезінде әуекомпания осы талаптарды ескереді және қажет болған жағдайда кестеге өзгеріс енгізеді.
Сонымен қатар әуе кемесі:
- экипаждың алдыңғы рейстен толық келуі;
- жолжүк пен жүктің барлық тексерулерінің аяқталуы;
- жерүсті қызметтерінің толық дайындығы
қамтамасыз етілгеннен кейін ғана ұша алады.
Әуекомпанияға тәуелді емес жағдайлар
Кейде рейстің кешігуі әуекомпанияға да, әуежайға да байланысты емес. Әуе кеңістігі мен әуежайлар шамадан тыс жүктелген кезде әуе қозғалысын басқару қызметтері қауіпсіз арақашықтықты сақтау үшін ұшуларды уақытша шектеуі немесе слоттарды өзгертуі мүмкін.
Мұндай жағдайда рейстер жалпы әуе қозғалысын ұйымдастыру жүйесіне байланысты кейінге шегеріледі.
Жолаушы не істей алады
FlyArystan жолаушыларға кешігулер кезінде жағдайды жақсырақ түсіну үшін мынадай кеңестер береді:
- байланыс деректерін өзекті күйде сақтау (ақпарат WhatsApp, SMS немесе e-mail арқылы жіберіледі);
- рейс мәртебесін сайттан немесе мобильді қосымшадан тексеру;
- ұшу және келу қалаларындағы ауа райын ескеру;
- ауысып мінетін рейстер болса, қосымша уақыт қарастыру;
- рейс кешіккен жағдайда көрсетілетін қызметтермен алдын ала танысу.
Авиация — қатаң бақылау мен нақты талаптардың арқасында ең қауіпсіз көлік түрлерінің бірі. Кейде рейстердің өзгеруі сөзсіз болуы мүмкін, алайда мұндай шешімдердің барлығы тек бір мақсатты көздейді — ұшу қауіпсіздігін қамтамасыз ету.
