Қазақстанда мемлекеттік басқаруда жасанды интеллектіні (ЖИ) енгізу тәсілін түбегейлі өзгертуді көздейтін AI Governance 500 ауқымды білім беру бағдарламасы басталды.
Оқудың алғашқы легінің ашылуына Премьер-Министрдің орынбасары — Цифрлық даму және жасанды интеллект министрі Жаслан Мадиев қатысты, деп хабарлайды DKNews.kz.
Бағдарлама басшыларға арналған және жаңа форматтағы басқарушыларды даярлауды мақсат етеді. Яғни, цифрлық сервистерді жай ғана пайдаланатын емес, жасанды интеллектіні мемлекеттік органдардың жұмысына жүйелі түрде енгізе алатын жетекшілер қалыптастыру көзделген.
Неліктен бұл дәл қазір маңызды?
Мемлекет басшысы 2026 жылды Цифрландыру және жасанды интеллект жылы деп жариялады. Осы тұрғыда AI Governance 500 бағдарламасының іске қосылуы — елдің стратегиялық бағытының қисынды жалғасы.
Жоба Президент Әкімшілігі мен Үкіметтің тапсырмасы бойынша Цифрлық даму және жасанды интеллект министрлігі Мемлекеттік қызмет істері агенттігімен бірлесіп жүзеге асыруда.
Алғашқы ағымға 100 басшы қатысуда. Олардың қатарында:
- Президент Әкімшілігі мен Үкімет Аппаратының өкілдері,
- салалық вице-министрлер,
- өңір әкімдерінің орынбасарлары,
- орталық және жергілікті мемлекеттік органдардың, сондай-ақ квазимемлекеттік сектордың жетекшілері бар.
Мемлекет жылдам әрі ақылды болуы тиіс
Бағдарламаның ашылуында сөйлеген сөзінде Жаслан Мадиев оның басты мақсаты — мемлекеттің тиімділігін арттырып, оны азаматтар мен экономиканың нақты қажеттіліктеріне бейімдеу екенін атап өтті.
«AI Governance 500 — “цифрлық офицерлер” пулын қалыптастырады. Бұл — жасанды интеллектіні деректерге, бірыңғай архитектураға және үздіксіз процестерге сүйене отырып енгізетін басшылар. Әр саладағы цифрлық және AI-шешімдерге ең алдымен сол саланың басшысы жауапты. Сондықтан әрқайсымыз басқару ойлау жүйемізді қайта қарап, цифрлық офицер болуға дайын болуымыз керек», — деді министр.
Оның айтуынша, әңгіме жекелеген IT-жобалар туралы емес, шешім қабылдаудан бастап мемлекеттік қызмет көрсетуге дейінгі процестерді түбегейлі трансформациялау жайында болып отыр.
Стратегиядан — нақты жобаларға дейін
AI Governance 500 бағдарламасы бірізді және практикалық логикамен құрылған. Қатысушылар:
- жасанды интеллектінің мемлекеттік басқарудағы рөлін түсінуден бастап,
- цифрлық мемлекеттің архитектурасын меңгеруге,
- нақты ведомстволар мен өңірлерде іске асыруға дайын қолданбалы AI-жобаларды әзірлеуге дейінгі толық жолдан өтеді.
Оқу нәтижесі ретінде формалды презентациялар емес, нақты іске қосуға болатын бастамалар ұсынылуы тиіс.
Жаңа буындағы цифрлық мемлекетке қадам
AI Governance 500 бағдарламасы Digital Qazaqstan тұжырымдамасы аясында ведомствоаралық цифрлық жобаларды іске асыра алатын, олардың үйлесімділігін қамтамасыз ететін және елдің стратегиялық мақсаттарына жұмыс істейтін тұрақты басқарушылық кадр резервін қалыптастырудың негізі ретінде қарастырылуда.
Осылайша, Қазақстан тек технологияларға ғана емес, сол технологиялар үшін жауап бере алатын адамдарға да басымдық беріп отыр. Ал дәл осы «цифрлық офицерлер» жасанды интеллектінің мемлекеттің нақты көмекшісіне айнала ма, әлде презентациядағы сәнді ұғым болып қала ма — соны айқындайтын басты фактор болмақ.
