Қызылордада өткен Ұлттық құрылтайдың V отырысында сөйлеген сөзінде Мемлекет басшысы Қасым-Жомарт Тоқаев Қазақстанда әлі де кездесетін қыз алып қашу фактілеріне қатысты қатаң ұстанымын білдірді. Президент мұндай әрекеттердің заңға да, адамгершілікке де қайшы екенін ашық айтты, деп хабарлайды DKNews.kz.
Мемлекет басшысының сөзінше, қыз алып қашуды дәстүр деп ақтауға болмайды.
«Бұл – адамды ұрлау»
Қасым-Жомарт Тоқаев бұл мәселеге нақты құқықтық баға берді.
«Қыз алып қашу – бұл адам ұрлау. Бұл ұлттың абыройына нұқсан келтіретін өрескел, жабайы қылмыс. Мұндай қатыгездікке ешқандай жағдайда жол беруге болмайды. Жыл өткен сайын қоғамның санасы өсіп, азаматтық жауапкершілік деңгейі артып келеді», – деді Мемлекет басшысы.
Президенттің айтуынша, қоғамда зорлық-зомбылықтың кез келген түріне төзбеушілік біртіндеп күшейіп келеді.
Заң бәрінен жоғары
Мемлекет басшысы заңнамадағы өзгерістер де осы қоғамдық ұстанымға сай болуы тиіс екенін атап өтті.
«Заң мен тәртіп баршаға ортақ, еліміздің әрбір азаматы заң талаптарын бұлжытпай орындауға міндетті», – деді Қасым-Жомарт Тоқаев.
Президент осылайша зорлықты салт-дәстүрмен бүркемелеуге жол берілмейтінін нақты жеткізді.
Ұлттық құрылтай Қызылордада өтуде
Қызылордада Ұлттық құрылтайдың бесінші отырысы өтіп жатыр. Бұл жиын 12 қаңтарда алдын ала жарияланған болатын. Президенттің көмекшісі – баспасөз хатшысы Руслан Желдібайдың хабарлауынша, Қасым-Жомарт Тоқаев Құрылтай барысында елдің одан әрі даму бағыттарын айқындайтын бағдарламалық сөз сөйлейді.
Сондай-ақ Мемлекет басшысы қоғам өміріндегі өзекті мәселелерге, соның ішінде құқықтық тәртіп, құндылықтар мен азаматтық жауапкершілік тақырыптарына ерекше назар аударады.
