Қазақстанда 2025 жылдың «Жұмысшы мамандықтар жылы» деп жариялануы еңбек нарығында қағаз жүзіндегі бастама емес, нақты өзгерістерге түрткі болған шешімге айналды. Көп жылдар бойы «уақытша жұмыс» немесе «балама нұсқа» ретінде қабылданып келген жұмысшы мамандықтар енді толыққанды, тұрақты әрі бәсекелі сегментке өтті, деп хабарлайды DKNews.kz.
Жалақының өсуі, кадр тапшылығы, өңірлер арасындағы еңбек миграциясы және жұмыс форматтарының әртараптануы – мұның бәрі 2025 жылдың басты белгілеріне айналды. Қандай мамандықтар сұранысқа ие болды және нарық қалай өзгерді?
Нарықтың жалпы көрінісі: миллиондаған вакансия, өсіп келе жатқан жалақы
OLX Қазақстанның аналитикалық қызметі ұсынған деректерге сүйенсек, жұмысшы мамандықтар бүгінде еңбек нарығындағы ең ауқымды сегменттердің бірін құрап отыр. Бірқатар позициялар бойынша жарияланған хабарландырулар саны миллиондап есептеледі.
Ең маңызды өзгерістердің бірі – жекелеген жұмысшы мамандықтардағы орташа жалақы деңгейінің кеңсе қызметкерлерінің табысына жақындауы, тіпті кей жағдайда одан асып түсуі.
2025 жылдың тағы бір айқын тренді – тұрғын үймен қамтамасыз ету, вахталық және ауысымдық жұмыс кестесі бар ұсыныстардың көбеюі. Бұл үрдіс әсіресе құрылыс, логистика және күзет салаларында анық байқалды.
2025 жылы ең сұранысқа ие жұмысшы мамандықтар
Еңбек нарығында сұраныс көлемі бойынша күзетшілер әлі де көш бастап тұр. 2025 жылы бұл мамандық бойынша шамамен 11,47 млн хабарландыру жарияланып, орташа жалақы 138 600 теңгені құрады.
Сатушылар да жоғары сұранысқа ие болды – жыл ішінде 3,86 млн хабарландыру, орташа жалақы 201 880 теңге. Бұл бөлшек сауда сегментінің тұрақты жұмыс істеп тұрғанын көрсетеді.
2025 жылдың ең белсенді әрі табысты санаттарының бірі – жүргізушілер. Бір жылда 3,67 млн вакансия жарияланып, орташа жалақы 517 350 теңгеге жетті. Мұндай өсім логистика, құрылыс және жеткізу сервистерінің қарқынды дамуымен байланысты.
Кассирлер сегментінде жалдау көлемі салыстырмалы түрде тұрақтанды – 2,89 млн хабарландыру, орташа жалақы 205 050 теңге. Бұл нарықтың белгілі бір тепе-теңдікке келгенін аңғартады.
Жүк тиеушілерге деген сұраныс та төмендеген жоқ. 2025 жылы шамамен 2,70 млн хабарландыру жарияланып, орташа жалақы 215 860 теңгені құрады. Бұл физикалық еңбекке деген тұрақты қажеттілікті көрсетеді.
HoReCa саласында даяшылар бойынша вакансиялар саны 1,76 млн шамасында қалыптасты. Орташа жалақы 244 мың теңге деңгейінде болды. Мұнда жалдау қарқыны бәсеңдегенімен, қаржылық жағдай сақталған.
Білікті жұмысшы мамандықтарға сұраныс артып келеді
Кадр тапшылығы айқын байқалатын мамандықтардың бірі – сантехниктер. 2025 жылы 316 мың хабарландыру жарияланып, орташа жалақы 166 000 теңгеге жетті.
Электриктер сегментінде 288 мың вакансия тіркеліп, орташа жалақы 231 750 теңгені құрады. Бұл салада сұраныс пен ұсыныс салыстырмалы түрде теңгерілген.
Ал слесарь мамандығы нарықта көлемі шағын болғанымен, тұрақты сұранысқа ие. 2025 жылы шамамен 50 мың хабарландыру жарияланып, орташа жалақы 278 100 теңгеге жетті. Бұл білікті қол еңбегінің құны жоғары екенін көрсетеді.
Жұмысшы мамандықтар – болашақтың таңдауы
2025 жыл жұмысшы мамандықтар үшін бетбұрыс кезеңі болды. Бұл салалар еңбек нарығында шеткері рөлден шығып, нақты бәсекелестік, өсіп келе жатқан табыс және ұзақмерзімді перспективасы бар бағытқа айналды.
«Жұмысшы мамандықтар жылы» тек атау ретінде ғана емес, нақты нарықтық өзгерістердің қозғаушы күшіне айналды. Сарапшылардың пікірінше, алдағы жылдары жүргізушілер, техникалық мамандар және вахталық форматтағы жұмысшыларға деген сұраныс одан әрі арта түседі.
Қазақстанда «көк жағалылар» енді балама емес, саналы әрі перспективалы таңдау ретінде қалыптасып келеді.
