Қазақстанда фармацевтика саласын сауықтыру және сыбайлас жемқорлық схемаларын әшкерелеу бойынша жүйелі жұмыс жалғасуда, деп хабарлайды DKNews.kz.
Кезекті резонансты деректі ҰҚК-нің Сыбайлас жемқорлыққа қарсы қызметі анықтап, медициналық бұйымдарды жалған түрде отандық өнім ретінде көрсеткен ауқымды схеманың жолын кесті.
Тергеу деректеріне сәйкес, OrdaMed акционерлік қоғамының басшылығы Қазақстан аумағында өз өндірісі бар деген жалған құжаттарды пайдаланып, мемлекеттік емдеу мекемелеріне медициналық жабдықтарды жеңілдетілген тәртіппен жеткізу кезінде заңсыз преференциялар алған.
Әңгіме денсаулық сақтау жүйесі мен халықтың өмірі үшін аса қажет 28 атаудағы медициналық бұйым туралы болып отыр. Құжат жүзінде өнім Қазақстанда өндірілген деп көрсетілгенімен, іс жүзінде дайын жабдық шетелден жеткізілген.
Осы заңсыз әрекеттердің салдарынан мемлекетке 4,5 млрд теңге көлемінде залал келтірілген.
Тінтулер мен қамаулар
Жүргізілген тінту барысында OrdaMed басшылығының қолынан жалпы құны 1 млрд теңгеден асатын инвестициялық монеталар тәркіленді. Сондай-ақ Interdentica, Erkin Brand және OrdaMed компанияларындағы үлестерге тыйым салынды.
Соттың санкциясымен OrdaMed компаниясының техникалық директоры, басқарма төрағасының бұрынғы басшысы және өндірістік басқарма жетекшісі қамауға алынды.
Тергеу жалғасуда
Қазіргі уақытта аталған дерек бойынша сотқа дейінгі тергеу амалдары жүргізіліп жатыр. Қазақстан Республикасының Қылмыстық-процестік кодексінің 201-бабына сәйкес, өзге ақпарат жария етілмейді.
ҰҚК өкілдері фармацевтика саласындағы қылмыстық схемаларды ұйымдастырушыларды әшкерелеу жұмысы жалғасатынын атап өтті. Негізгі басымдық — мемлекеттік қаражатты қорғау, нарықтың ашықтығын қамтамасыз ету және азаматтардың денсаулығына тікелей қатысты салада кез келген теріс пайдалануға жол бермеу.
