Қазақстанда отандық өндірісті қолдауға бағытталған Мемлекеттік ақпараттық жүйе — «Қазақстандық тауар өндірушілер тізілімі» нақты өндірісі бар кәсіпорындарды іріктеудің маңызды құралына айналып келеді. Алғашқы нәтижелер-ақ бұл жүйеде формалды тәсілге орын жоқ екенін көрсетті, деп хабарлайды DKNews.kz.
2026 жылғы 30 қаңтардағы жағдай бойынша Тізілімге енгізу үшін барлығы 11 609 өтінім берілген. Алайда олардың бәрі бірдей тексеруден өте алмады. 457 субъектіден 2 556 өтінім кері қайтарылды. Оның ішінде 41 компанияның 206 өтінімі төмен скоринг нәтижесіне байланысты қабылданбаған.
Қазіргі таңда Тізілімде 605 субъектіден 2 671 өтінім тіркеліп отыр.
Неліктен өтінімдер қабылданбады
Өтінімдердің бір бөлігі құжаттағы қателіктер үшін емес, ең бастысы — нақты өндірістік қызметтің расталмағаны үшін кері қайтарылған. Тексеру барысында кейбір кәсіпорындар ұсынған құжаттар мен бейнематериалдарда көрсетілген қызмет түрлері мен жұмыс форматтары өтінімде мәлімделген деректерге сәйкес келмегені анықталған.
Атап айтқанда, «SapAZ» ЖШС, «ДатаХимПром» ЖШС, «SamrukOrda» ЖШС, «Reemax» ЖШС, «Golden Way LTD» ЖШС, «Шебер» қоғамдық бірлестігі және «DD21» ұйымына қатысты осындай сәйкессіздіктер тіркелген.
Бұл жағдайлар Тізілімді құрудағы негізгі ұстанымды айқын көрсетті — мәртебе қағаз жүзінде емес, нақты өндіріс арқылы расталуы тиіс.
«Цифрлық верификация қазақстандық тауар өндіруші мәртебесінің формалды түрде берілуіне жол бермейді. Тізілім тек құжаттар пакетін ғана емес, нақты өндірістік қызметтің бар-жоғын тіркейді», — деді Қазақстан Республикасы Өнеркәсіп және құрылыс министрлігінің өнеркәсіптік инфрақұрылымды дамыту және ішкі құндылықтар департаментінің директоры.
Автоматты түрде енгізілген кәсіпорындар
Сонымен қатар бұрын өз мәртебесін растаған кәсіпорындар үшін жеңілдетілген тетік қарастырылған. Индустриялық сертификаттар негізінде 1 924 кәсіпорын Қазақстандық тауар өндірушілер тізіліміне автоматты түрде енгізілген.
Бұл компаниялар бұрыннан нақты өндірістік қызметпен айналысып, тиісті тексерулерден өткен.
Тізілім не үшін қажет
Қазақстандық тауар өндірушілер тізілімі — бұл жай ғана дерекқор емес. Ол отандық өндіруші мәртебесін растаудың бірыңғай цифрлық жүйесін қалыптастырып, мемлекеттік қолдау шараларының, сатып алулар мен преференциялардың әділ бөлінуін қамтамасыз етуге бағытталған.
Сарапшылардың пікірінше, жаңа жүйе ішкі нарықты «қағаз жүзіндегі өндірушілерден» тазартуға мүмкіндік береді. Бұл, өз кезегінде, нақты өнім шығарып отырған кәсіпорындардың бәсекелік артықшылығын күшейтеді.
Бизнесті не күтіп тұр
Енді отандық өндіруші мәртебесін алғысы келетін компаниялар үшін талап айқын: өндіріс шынайы болуы керек. Жабдық, персонал, технологиялық процесс және нәтиже — барлығы цифрлық құралдар арқылы тексеріледі.
Бұл өзгеріс кейбір кәсіпорындар үшін қиындық туғызуы мүмкін. Бірақ ұзақ мерзімді перспективада Тізілім отандық өндірісті қолдаудың тиімді әрі әділ тетігіне айналуы тиіс.
Қазақстанда «қазақстандық тауар өндіруші» деген атақ енді тек атау емес, нақты экономикалық мазмұнға ие бола бастады.
