Өткен жылы Төтенше жағдайлар министрлігінің қызметкерлері жануарларға 400-ден астам жағдайда көмек көрсетті. Бұл – тек ресми тіркелген шақыртулар. Ал шын мәнінде, мұндай оқиғалар одан да көп болғаны айтылады. Үй жануарлары да, жабайы жануарлар да кейде адам көмегінсіз шыға алмайтын жағдайға тап болады. Осындай сәттерде құтқарушылардың жұмысы басталады, деп хабарлайды DKNews.kz.
Күнделікті қызметте ТЖМ мамандары көбіне мысықтар, иттер мен жылқыларға көмек көрсеткен. Алайда бұл жұмыстың ауқымы бұдан әлдеқайда кең. Жыл бойы құтқарушылар түрлі жағдайда қалған жабайы аң-құстарға да қол ұшын созды. Мұндай шақыртулар еліміздің барлық өңірлерінде – ірі қалаларда да, дала мен жетуі қиын аумақтарда да тіркелген.
«Әрбір шақырту – бөлек оқиға. Бірдей сценарий болмайды», – дейді құтқарушылар.
Әр шақырту – жедел шешім
Жануарларды құтқару кезінде стандартты алгоритмдер сирек көмектеседі. Көп жағдайда шешім сол жерде, секундтар ішінде қабылданады. Соған бір мысал – Ақтөбеде болған оқиға. Қыстың қақаған кезінде жылқы өзенге түсіп, мұз астына кеткен. Құтқарушылар оқиға орнына жаяу жетіп, үш сағатқа жуық мұзды жарып, жануарға жол ашқан. Нәтижесінде жылқы аман қалып, жылы қораға жеткізілді.
Мұндай сәттерде техника емес, адам төзімі мен тәжірибесі шешуші рөл атқарады.
Қалалық жағдайдағы құтқару
Қалаларда да қауіп аз емес. Астанада битумға батып қалған итті құтқару үшін мамандар қолда бар құралдардың бәрін пайдаланған. Жануар абайлап босатылып, иесіне тапсырылды.
Қостанай облысында түн ортасында құдыққа құлап кеткен күшікті шығару қажет болды. Құтқарушы альпинистік жабдықпен шамамен тоғыз метр тереңдікке түсті. Ал Қарағандыда жеке үйдің шатырында қозғала алмай қалған жаңа туған марғау аман алып қалынды.
Бұл – көзге көрінбейтін, бірақ аса мұқият жұмысты талап ететін жағдайлар.
Өрт кезіндегі жауапкершілік
Өрт кезінде жануарлар да назардан тыс қалмайды. Қарағандыдағы көпқабатты үйдің жертөлесінде шыққан өрт кезінде құтқарушылар тұрғындарды эвакуациялап қана қоймай, түтінге уланып, ес-түссіз жатқан итті тапты.
Жануарға тыныс алу аппараты арқылы алғашқы көмек көрсетіліп, кейін иесіне тапсырылды.
«Өртте адам да, жануар да бірдей қауіпке тап болады», – дейді құтқарушылар.
Көзге көрінбейтін еңбектің бір бөлігі
Жануарларды құтқару – ТЖМ-нің жалпы авариялық-құтқару қызметінің ажырамас бөлігі. Статистикадағы 400-ден астам жағдай – үлкен еңбектің тек бір бөлігі ғана.
Бұл жұмыста «маңызды» немесе «екінші кезектегі» деген ұғым жоқ. Өмірге қауіп төнген жерде көмек көрсетіледі. Зардап шеккен тіршілік иесі екі аяқпен жүре ме, әлде төрт аяқпен бе – айырмашылық жоқ.
ТЖМ құтқарушылары үшін басты қағида өзгермейді: көмек керек болса, ол міндетті түрде көрсетіледі.
