Астанада былтыр пайдалануға берілген жаңа білім беру ұйымдарының бірі – №116 жалпы орта білім беретін мектепте «Әкем, анам және мен» атты отбасылық эстафета ұйымдастырылды. Іс-шара қыс мезгілінде ашық ауада өтіп, ата-аналар мен балаларды бір алаңға тоғыстырды, деп хабарлайды DKNews.kz.
«Келешек мектептері» аясындағы жаңа білім ордасы
Аталған мектеп Мемлекет басшысының тапсырмасына сәйкес «Келешек мектептері» ұлттық жобасы аясында салынған. Бүгінде мұнда 3 мыңға жуық оқушы білім алады. Жаңа мектеп тек оқу процесімен ғана емес, тәрбиелік және спорттық бастамаларымен де ерекшеленіп отыр.
Қысқы форматтағы ерекше эстафета
Бұл жолы мектеп басшылығы бес кезеңнен тұратын отбасылық спорттық жарыс өткізді. Эстафетаның басты ерекшелігі – оған тек 3-сынып оқушылары мен олардың ата-аналарының қатысуы.
Мектеп директорының тәрбие ісі жөніндегі орынбасары Тілекқабыл Оразғалиұлының айтуынша, мұндай формат кездейсоқ таңдалмаған.
«Қыс мезгілінде алғаш рет далада отбасылық эстафета ұйымдастырып отырмыз. Мақсатымыз – салауатты өмір салтын насихаттап, ата-аналар арасындағы ынтымақтастықты нығайту. Алдағы уақытта өзге сыныптар арасында да түрлі спорттық және тәрбиелік шаралар өткізуді жоспарлап отырмыз», – деді ол.
Қандай сайыстар болды
Жарысқа барлығы 11 команда қатысты. Олар:
– таяқшамен жүгіру;
– тәрелке жинау;
– шеңбермен жүгіру;
– шанамен жарысу;
– жылдамдыққа бауырсақ жеу кезеңдерінде бақ сынасты.
Жеңімпаздар барлық тапсырманы орындауға кеткен уақыт нәтижесі бойынша анықталды.
Ата-аналардың пікірі
Қатысушылардың айтуынша, мұндай шаралар отбасылық қарым-қатынасты нығайтуға сеп болады.
«Күнделікті жұмысбастылықтан кейде балаларымызға жеткілікті көңіл бөле бермейміз. Бүгін баламызбен бірге уақыт өткізіп, өзіміз де сергіп қалдық. Осындай жарыстар жиі болса, әрдайым қатысуға дайынбыз», – деді «Дарын» командасының мүшесі Қуантай Мырзабеков.
Жарыс соңындағы жылы атмосфера
Эстафета аяқталған соң барлық командалар марапатталып, қатысушыларға ыстық шай мен бауырсақ ұсынылды. Ұйымдастырушылардың айтуынша, басты жеңіс – жүлде емес, отбасылық бірлік пен ортақ көңіл күй.
Мектепте спорттан бөлек театр, дебат секілді тегін үйірмелер де жұмыс істейді. Бұл оқушылардың жан-жақты дамуына бағытталған.
