Алматы қаласында орналасқан, 80 жылдық тарихы бар 7552 әскери бөлімінде жас сарбаздардың әскери ант қабылдау рәсімі өтті. Салтанатты шара жас жауынгерлер үшін ғана емес, олардың ата-аналары мен әскери орта үшін де маңызды әрі толқынысқа толы сәтке айналды, деп хабарлайды DKNews.kz.
Салтанатты рәсімге кімдер қатысты
Іс-шараға Қазақстан Республикасы Ұлттық ұланының «Оңтүстік» өңірлік қолбасшылығының өкілдері, әскери бөлімнің ардагерлері, Алматы қаласындағы №150 және №210 мектеп-лицейлердің «Жас сарбаз» сыныптарының тәрбиеленушілері, сондай-ақ сарбаздардың ата-аналары мен жақын туыстары жиналды.
Бұл кездесу буындар сабақтастығын көрсетіп, әскери-патриоттық тәрбиенің маңызын айқындай түсті.
«Жас сарбаздардың» әскери бөлімге сапары
Әскери ант қабылдау рәсімінің алдында «Жас сарбаз» сыныбының оқушылары жетекшілері, запастағы полковниктер Ниязтай Әлкешев пен Елдос Шалабаевтың бастауымен әскери бөлім аумағымен танысты.
Оқушылар сарбаздардың жатын үй-жайын көріп, тұрмыс-тіршілігімен танысты, асханаға барып, әскери тағамнан дәм татты. Бұл сапар жас өрендердің жадында ұзақ сақталары анық. Ұйымдастырушылардың айтуынша, мұндай кездесулердің басты мақсаты – жастардың бойында Отанға деген құрмет пен жауапкершілік сезімін қалыптастыру.
Мемлекеттік рәміздерге тағзым
Саптық алаңдағы салтанатты рәсім Қазақстан Республикасының Мемлекеттік Гимнімен ашылды. Елдің көк байрағы салтанатты түрде көтерілді. Мемлекеттік Туды көтеру құрметі оқу пунктінің үздік сарбазы, қатардағы Дәурен Сүлейменовке берілді.
Командирдің құттықтауы
Салтанатты жиында сөз сөйлеген Қазақстан Республикасы Ұлттық ұланы «Оңтүстік» өңірлік қолбасшылығы қолбасшысының техника және қару-жарақ жөніндегі орынбасары, полковник Мақсат Кенжебеков жас сарбаздарды өмірлеріндегі маңызды кезеңмен құттықтады.
«Бүгін сіздер Отан алдындағы қасиетті борышты адал атқаруға серт беріп отырсыздар. Әскери ант – бұл үлкен жауапкершілік пен жоғары сенімнің белгісі. Тәртіпке берік болып, ел қауіпсіздігін қамтамасыз ету жолында адал қызмет етулеріңізге тілектеспін», – деді ол.
Ананың жүрекжарды сөзі
Рәсім барысында мінберге сарбаздың анасы Рабиға Аманәліқызы көтеріліп, жас жауынгерлерге ақ тілегін арнады.
«Бүгін ұлдарымыздың ел қорғау жолына нық қадам басқанын көріп, ата-ана ретінде ерекше мақтаныш сезімін бастан өткеріп отырмыз. Барша сарбаздарға амандық, төзімділік пен табандылық тілеймін. Ел сенімін ақтайды деп сенеміз», – деді ол.
Алдағы қызмет жолы
Жас жауынгер курсынан өтіп, әскери ант қабылдаған сарбаздар алдағы бір жыл бойы құқық қорғау әскерінің қатарында қызмет атқарады. Бұл кезең олардың өміріндегі жауапты әрі тәрбиелік мәні зор мектеп болмақ.
Бір күнде бірнеше өңірде
Айта кетейік, осы күні «Оңтүстік» өңірлік қолбасшылыққа қарасты Шымкент қаласындағы 6698, Жетісу облысындағы 5514 және Алматы облысындағы 3660 әскери бөлімдерінде де әскери ант қабылдау рәсімі өтті. Жалпы саны 600-ге жуық жас сарбаз Отан алдындағы қасиетті борышына адал болуға ант берді.
