Жамбыл облысындағы Қордай ауданында қыс тағы да мінез көрсетті, деп хабарлайды DKNews.kz.
Қордайдың ескі асуында (170–190 шақырым аралығы) ауа райының күрт нашарлауына байланысты ондаған көлік қар құрсауында қалып, қозғалыс уақытша тоқтады.
Қатты боран мен қарлы жел жүк көліктерінің жолдың жүру бөлігін жауып қалуына себеп болған. Соның салдарынан асу бойында көлік кептелісі пайда болып, жүргізушілер бірнеше сағат бойы жолда қалуға мәжбүр болды.
Оқиға орнына шұғыл жеткен Төтенше жағдайлар министрлігінің күштері жағдайды бақылауға алып, құтқару жұмыстарын бастады. Нәтижесінде қар құрсауынан 50 жеңіл және 30 жүк автокөлігі қауіпсіз аймаққа шығарылды. Ресми мәліметке сәйкес, құтқарылғандардың арасында зардап шеккендер жоқ.
Мамандардың айтуынша, Қордай асуы – қыс мезгілінде ең қауіпті учаскелердің бірі. Бұл өңірде жел екпіні жоғары, ал ауа райы бір сәтте өзгеріп кетуі мүмкін. Сол себепті құтқарушылар жүргізушілерді жолға шықпас бұрын ауа райы болжамын мұқият тексеруге және жолдардың жабық-жабық еместігін нақтылауға шақырады.
Ауа райының қолайсыздығына және бірқатар автожолдардың жабылуына байланысты Жамбыл облысы Төтенше жағдайлар департаменті азаматтарға психологиялық қолдау көрсету және жедел ақпарат беру мақсатында арнайы «жедел желі» телефондарының жұмысын ұйымдастырды.
Жедел желі нөмірлері:
- 8 (7262) 43-58-97
- 8 (7262) 43-58-39
Құтқарушылар алдағы күндері де қар мен боран қаупі сақталуы мүмкін екенін ескертеді. Сондықтан жолға шыққанда сақтық шараларын ұмытпай, қажетсіз тәуекелге бармау маңызды. Қысқы жол – кешірмейтін орта.
