Әскери қызмет пен шығармашылық — бір-біріне кереғар ұғым сияқты көрінуі мүмкін. Алайда Ақтаудағы гарнизонда мерзімді әскери қызметін өтеп жүрген матрос Бақдәулет Күздібаев бұл стереотипті жоққа шығарып отыр, деп хабарлайды DKNews.kz.
Атырау облысынан төрт ай бұрын Қазақстан Әскери-теңіз күштерінің қатарына шақырылған жас сарбаз бүгінде теңіз жаяу әскерінің десанттық-шабуылдау батальонында механик-жүргізуші болып қызмет атқарады. Қатаң күн тәртібі, үздіксіз жаттығулар мен әскери дайындыққа қарамастан, ол бос уақытын қылқалам мен бояуға арнаудан бас тартпаған.
Бақдәулеттің сурет салуға деген қызығушылығы бала кезінен басталған. Мектеп қабырғасында жүріп-ақ стендтерді, плакаттар мен қабырға суреттерін безендіріп, шығармашылыққа жақын екенін көрсеткен. Студенттік жылдары да бұл әуестігін жалғастырған. Ал әскерге келген соң, өз қабілетін жасырмай, командирлеріне ашық айтқан. Нәтижесінде оның бастамасы қолдау тауып, матросқа шығармашылықпен айналысуға мүмкіндік берілген.
Қазір ол қызметтен бос уақытында Қазақстан тарихындағы батырлар мен хандардың бейнесін салумен айналысады. Әрбір туынды — жай ғана сурет емес, ұлттық жадыға қосылған үлес іспетті. Матростың айтуынша, оның басты мақсаты — туған әскери бөлімінде із қалдырып, өзінен кейін келетін сарбаздардың ел тарихын танып, батырларға деген құрметін арттыру.
Осы уақытқа дейін Бақдәулет Күздібаев бірнеше ауқымды жұмысын аяқтаған. Олардың қатарында ел тарихында өшпес із қалдырған белгілі батырлар мен хандардың бейнелері бар. Сонымен қатар ол аңызға айналған қолбасшы, ерлігімен елге үлгі болған Бауыржан Момышұлына арналған жеке туынды да салған.
Бақдәулеттің өмір жолы бір маңызды шындықты айқын көрсетеді: әскер — тек қатаң тәртіп пен физикалық дайындық қана емес. Бұл ортада да адам өзін дамытып, шығармашылығын шыңдап, елге пайдалы іс атқара алады. Оның үлгісі — жас сарбаздарға мотивация, ал қоғам үшін әскери қызметшінің бейнесін жаңа қырынан көрсететін жарқын мысал.
