Премьер-министрдің орынбасары Қанат Бозымбаев жұмыс сапары аясында Қарағанды облысының көктемгі су тасқыны кезеңіне дайындығын тексерді, деп хабарлайды DKNews.kz.
Вице-премьер су басу қаупі бар Бұқар жырау, Қарқаралы, Шет және Абай аудандарындағы негізгі гидротехникалық құрылыстар мен елді мекендердің жағдайын бағалады.
Нұра және Шерубай-Нұра өзендері бақылауда
Нұра өзенінің арнасы бойында:
- Көкпекті
- Байқадам
- Петровка
- Сарытөбе
- Ботақара
- Шешенқара
ауылдары қаралды.
Сонымен қатар «Байқадам» және «Миньковская» су бөгеттері мен Ащысу су қоймасы тексерілді.
Шерубай-Нұра өзені бойында Қарашоқы, Бесоба, Ақсу-Аюлы, Қайрақты, Нұраталды, Ақсу және Шопа елді мекендерінің жай-күйі бағаланды. Красная Поляна ауылындағы қорғаныс бөгеттері де назардан тыс қалған жоқ.
Су қоймалары мен гидротораптар тексерілді
Абай ауданында Южный, Құлаайғыр және Тасзаемка ауылдары қаралды. Сондай-ақ:
- «Шерубай-Нұра» су қоймасы
- «Жартас» су қоймасы
- Самарқанд су қоймасы гидроторабы
зерделенді.
Чкалов ауылындағы қорғаныс бөгеттерінің жағдайы да тексерілді.
Өңірде қандай жұмыстар атқарылды
Қарағанды облысы әкімдігінің мәліметінше, негізгі су тасқынына қарсы іс-шаралар аяқталған. Қазіргі уақытта жұмыстар Теміртау қаласында жалғасуда.
Өңірде:
- 25 шақырым қорғаныс дамбалары мен бөгеттер салынды және нығайтылды
- 28 шақырымнан астам өзен арнасына санация жүргізілді
- 21 шақырым дренаж және су бұру жүйесі тазартылды
- 54 автожол учаскесінде су өткізу қабілеті арттырылды
- 4 гидротехникалық нысан жөнделді
Сонымен бірге шамамен 1 млн 200 мың текше метр қар шығарылған.
Қауіпті аймақтар ерекше бақылауда
Облыстың 7 ауданында және 4 қаласында су басу қаупі бар:
- 139 елді мекен
- автомобиль және теміржолдардың 130 қауіпті учаскесі
ерекше бақылауға алынған.
217 су шаруашылығы нысаны тұрақты мониторингте тұр. Қазіргі уақытта өңірдегі су тасқыны жағдайы тұрақты. Негізгі су қоймалары штаттық режимде жұмыс істеп тұр. Самарқанд және Ынтымақ су қоймаларынан санитарлық су жіберу жүргізілуде.
Жоғары дайындық режимі енгізіледі
Бүгін «Көктем-2026» республикалық командалық-штабтық оқу-жаттығуы басталды. ТЖМ аумақтық деңгейдегі хабарландыру жүйесінің дайындығын тексерді.
1 наурыздан бастап төтенше жағдайлардың алдын алу мақсатында азаматтық қорғаудың аумақтық кіші жүйесінің барлық күштері мен құралдары жоғары дайындық режиміне көшіріледі.
Жауап беру шараларына:
- 3 579 адам
- 1 047 техника бірлігі
жұмылдырылған.
