Қазақстандағы автонарық жаңа кезеңге қадам басты. Электрлендіру енді тек болашақтың тренді емес - ол бүгінгі күннің нақты таңдауы.
Осы өзгерістің айқын белгісі ретінде Lynk & Co бренді елімізде 08 EM-P гибридті кроссоверіне алдын ала тапсырыс қабылдауды бастады. Қаладағы үнсіз жүріс пен трассадағы ұзақ сапарды біріктіретін модель қазақстандық жүргізушілердің қызығушылығын бірден оятты, деп хабарлайды DKNews.kz.
2026 жылғы 26 ақпанда Алматыда Orbis Auto автомобиль тобының құрамына кіретін Lynk & Co ресми дистрибьюторы жаңа флагмандық кроссовердің іске қосылғанын жариялады. Модельге 5 жыл немесе 150 000 шақырым жүріске дейінгі ресми кепілдік берілуі брендтің технологияға деген сенімін айқындайды.
Қалада электр, трассада қуат
Lynk & Co 08 заманауи модульдік архитектура негізінде жасалып, интеллектуалды EM-P гибридті жүйесімен жабдықталған. Қуат қондырғысы 1,5 литрлік турбо қозғалтқыш пен электр жетегін біріктіреді. Нәтижесінде жүйенің жиынтық қуаты 350 ат күшіне жетіп, 580 Н·м айналу сәтін қамтамасыз етеді.
Кроссовер динамика жағынан да әсерлі: 100 км/сағ жылдамдыққа 6,75 секундта жетеді, ал ең жоғарғы жылдамдығы 215 км/сағ. Қозғалыстың электр қуатымен басталуы көлікке бірқалыптылық пен дыбыссыздық береді, бұл әсіресе қалалық қозғалыста маңызды.
39,6 кВт·сағ батарея WLTC циклі бойынша 200 шақырымға дейін таза электр режимінде жүруге мүмкіндік береді. Ал гибридті режимдегі жалпы жүріс қоры 1 100 шақырымға дейін жетеді. Бұл көрсеткіш көлікті күнделікті қала ішіндегі сапарларға да, ұзақ жолдарға да әмбебап етеді.
Жылдам қуаттау функциясы да практикалық артықшылық береді: батареяны 30%-дан 80%-ға дейін толтыру шамамен 28 минутты алады, ал айнымалы тоқпен толық қуаттау 4,5 сағатқа жуық уақытты қажет етеді.
Гибридтер жаңа таңдауға айналуда
Қазақстанда гибридті технологияларға деген қызығушылық тұрақты өсіп келеді. Жүргізушілер жанармай үнемділігі мен экологиялық тиімділікті сақтай отырып, ұзақ сапарларда шектеусіз қозғалыс мүмкіндігін қалайды. Lynk & Co 08 дәл осы тепе-теңдікті ұсынады.
«Гибридті көліктер ендігі жерде «тар шеңбердегі» өнім емес, көптеген клиенттер үшін саналы таңдауға айналды. Адамдар үшін қала ішінде электр қуатымен жүре ала отырып, алыс сапарларда да еркін жүре алуы маңызды. Lynk & Co 08 EM-P моделі 200 шақырымға дейінгі электрлік жүріс пен 1 100 шақырымға дейінгі жалпы қорды ұштастырады. Дәл осындай тепе-теңдік бүгінгі нарықта ең сұранысқа ие нұсқа», - деп атап өтті Қазақстандағы Lynk & Co дистрибьюциясының директоры Мұхамед Жәлилов.
Премиум жайлылық пен технология
Кроссовердің габариті оның мәртебесін айқын көрсетеді: ұзындығы - 4 820 мм, ені - 1 915 мм, биіктігі - 1 685 мм, ал дөңгелек базасы 2 848 мм. 186 мм жол саңылауы көлікті әртүрлі жол жағдайына бейімдейді.
Алдыңғы McPherson және артқы көпиінді аспалар басқарылу мен жайлылықтың үйлесімін қамтамасыз етеді. Рекуперация, қозғалыс режимдерін таңдау және тұрақтандырудың электронды жүйелері көліктің түрлі жағдайларда сенімді қозғалуына ықпал етеді.
Қазақстанда модель Pro және Halo жиынтықтарында ұсынылады. Halo нұсқасы жайлылыққа басымдық береді: перфорацияланған Nappa былғарысы, желдету және массаж функциясы бар орындықтар, панорамалық шатыр және интерьердің амбиентті жарығы премиум атмосфера қалыптастырады.
23 динамигі бар Harman/Kardon аудиожүйесі көлемді дыбыс береді, ал 15,4 дюймдік орталық дисплей мен 10,2 дюймдік цифрлық панельден тұратын мультимедиялық жүйе сымсыз жаңартуларды, 5G байланысын және смартфонмен интеграцияны қолдайды.
Қауіпсіздік - басты басымдық
Екі жиынтық та жүргізушіге көмекші жүйелердің толық пакетімен жабдықталған. Олардың қатарында бейімделген круиз-бақылау, жолақты сақтау жүйесі, автоматты шұғыл тежеу, көрінбейтін аймақтарды бақылау және белсенді-пассивті қауіпсіздік кешені бар.
Модель Euro NCAP талаптарына сай келеді және технологиялық шешімдерді, сенімділік пен қауіпсіздікті жоғары бағалайтын жүргізушілерге бағытталған.
Қай кезде сатылымға шығады
Lynk & Co 08 кроссоверінің сатылымы наурызда Астана мен Алматыда басталады, сәуірде Шымкентке жетеді, ал бірінші жартыжылдықта Қарағандыда пайда болады. Сонымен қатар 2026 жылы Астана мен Алматыда брендтің ресми шоурумдарын ашу жоспарланған.
Алдын ала тапсырыс бағдарламасы алғашқы сатып алушыларға арнайы ұсыныстар қарастырады, бұл модельді алғашқы болып иеленгісі келетіндер үшін қосымша ынталандыру болмақ.
Lynk & Co 08 EM-P-нің Қазақстанға келуі гибридті көліктердің нарықтағы орнын күшейтіп, жүргізушілерге жаңа форматтағы мобильділікті ұсынады. Қалада үнсіз қозғалыс, трассада сенімділік және технологиялық жайлылық - дәл осы үйлесім жаңа буын кроссоверінің басты ерекшелігіне айналып отыр.
