Елордадағы Белсенді ұзақ өмір сүру орталығының зейнеткерлері 1 наурыз – Алғыс айту күніне орай «Алғыс жүректен шыққан сөз» атты мерекелік іс-шара ұйымдастырды, деп хабарлайды DKNews.kz.
Кеш концерт форматында өтіп, ардагерлер көктем мерекесі қарсаңында өз өнерлерін көрерменге тарту етті.
Бірлік пен сыйластық мерекесі
Ұйымдастырушылардың айтуынша, шараның басты мақсаты – Қазақстанды ортақ үй ретінде құрметтеуге шақыру, түрлі этнос өкілдерінің достығы мен өзара сыйластығын нығайту.
Орталық басшысы Роза Байсалбаева:
«Алғыс айту күніне орай мерекелік концерт ұйымдастырып отырмыз. Орталыққа жиі келетін ардагерлер өнер көрсетеді. Басқа этнос өкілдері қазақ халқына алғыстарын айтады. Орталыққа келушілер саны төрт мыңнан асады. Барлығы бір-бірімен тату-тәтті араласып тұрады. Ардагерлердің мереке қарсаңындағы көңіл күйлері тамаша», – деді.
Концерт бағдарламасы
Мерекелік кеш барысында түрлі шығармашылық нөмірлер ұсынылды:
- «Жасар» дефиле клубының көрсетілімі
- «Ата толғауы» домбырашылар ансамблінің орындауы
- халық билері
- шығармашылық қойылымдар
Сондай-ақ өзге этнос өкілдері жүрекжарды алғыс айтып, кештің ерекше атмосферасын толықтырды.
