Премьер-министр Олжас Бектеновтің төрағалығымен өткен Үкімет отырысында тұрғын үй құрылысын дамыту және саланы цифрландыру мәселелері қаралды.
Жиында құрылыс саласындағы атқарылып жатқан жұмыстар туралы Премьер-министрдің орынбасары – жасанды интеллект және цифрлық даму министрі Жаслан Мәдиев, өнеркәсіп және құрылыс министрі Ерсайын Нағаспаев, «Бәйтерек» ҰИХ» АҚ басқарма төрағасының бірінші орынбасары Нұрболат Айдапкелов, сондай-ақ Түркістан, Қостанай, Батыс Қазақстан және Маңғыстау облыстарының әкімдері баяндама жасады.
Былтыр 20 млн шаршы метр тұрғын үй пайдалануға берілді
Премьер-министр Мемлекет басшысының азаматтардың тұрмыс сапасын жақсарту жөніндегі тапсырмаларын еске салды.
«Мемлекет басшысы Үкіметтің кеңейтілген отырысында азаматтардың тұрмыс сапасын жақсартуға ықпал ететін, ең бастысы, елге пайдасы тиетін нақты нәтижеге қол жеткізу басты мақсат болуы тиіс екенін атап өтті. Бұл міндетті іске асыруға құрылыс секторы тың серпін беретіні анық. Өткен жылы салада 16% деңгейінде өсім сақталды. 20 млн шаршы метр тұрғын үй пайдалануға берілді. 185 мың отбасы баспана жағдайын жақсартты. Биыл да құрылыс қарқынын сақтай отырып, тұрғын үйді қолжетімді ету бағытында жұмысты жалғастыру керек», — деді Олжас Бектенов.
Тұрғын үй саласы цифрлық форматқа көшірілуде
Үкімет азаматтар үшін мемлекеттік қолдау құралдарын алуды жеңілдететін шаралар кешенін қабылдады.
Атап айтқанда, тұрғын үй саясатында негізгі рөл атқаратын Отбасы банкі ұлттық даму институты мәртебесіне ие болды, ал тізімдерді цифрлық форматқа көшіру адам факторын азайтып және тұрғын үйді есепке алу мен бөлу рәсімдерінің ашықтығын арттырды.
Сонымен қатар «Наурыз» және «Наурыз – жұмыскер» бағдарламалары арқылы жалпы көлемі 233 млрд теңгеге 8,5 мыңнан астам несие берілді.
Ірі қалаларда құрылыс қарқыны өсіп келеді
Премьер-министр тұрғын үйді пайдалануға беру жоспарларын орындау, қалаларда жайлы орта қалыптастыру және инженерлік-коммуникациялық инфрақұрылымды дамыту жұмыстарын жеделдету қажеттігін айтты.
Оның айтуынша, әсіресе Астана мен Алматы қалаларында құрылыс көлемі артып келеді, сонымен бірге моноқалалар мен ауылдық жерлердегі тұрғын үй құрылысын дамытуға да ерекше көңіл бөлу қажет.
Осыған байланысты Өнеркәсіп және құрылыс министрлігі «Бәйтерек» холдингімен және әкімдіктермен бірлесіп өңірлік тұрғын үй бағдарламаларын жандандыруы тиіс.
Құрылыс сапасына қатысты 63 мыңнан астам шағым түскен
Үкімет отырысында құрылыс сапасы мәселесіне ерекше назар аударылды.
«Мемлекет басшысы халыққа Жолдауында құрылыс қарқыны қауіпсіздік пен сапаға кесірін тигізбеуі керек екенін атап өтті. Өткен жылы құрылыстың сапасына қатысты ресми түрде 63 мыңнан астам шағым келіп түскен. Жаңа Құрылыс кодексі осындай олқылықтардың алдын алуға бағытталып отыр. Ол ескірген нормалардан халықаралық стандарттарға, цифрлық және автоматтандырылған технологияларға көшу арқылы бүкіл саланы жүйелі түрде жаңартуды қамтамасыз етеді», — деді Премьер-министр.
Құрылыс саласында бақылау күшейтілді
Құрылыс кодексі аясында мемлекеттік бақылау күшейтіліп, тексеруші органдарға жаңа құралдар мен цифрлық технологиялар енгізілді.
Сонымен қатар нысандарды қабылдау кезінде құрылысты бақылау органдары мен төтенше жағдайлар қызметтерінің міндетті қатысу тетігі енгізілді, ал үлестік құрылыс саласында талаптар қатаңдатылып және мемлекеттік рұқсатсыз құрылыс компаниялары үлескерлердің қаражатын тарта алмайтын тәртіп бекітілді.
Құрылыс саласына жасанды интеллект енгізіледі
Үкімет құрылыс саласын цифрландыруға ерекше назар аударып отыр.
Бірыңғай құрылыс порталы барлық жүйені «бір терезе» қағидаты бойынша біріктіріп, артық бюрократияны қысқартуға мүмкіндік береді.
Премьер-министр Өнеркәсіп және құрылыс министрлігі мен Жасанды интеллект министрлігіне шілде айының соңына дейін жобаларды сараптауға арналған жасанды интеллект модульдерін пилоттық режимде іске қосуды тапсырды.
Үкімет үш негізгі тапсырма берді
Отырыс қорытындысы бойынша Премьер-министр бірнеше маңызды тапсырма берді.
- екінші деңгейлі банктердің коммерциялық ипотекасын жетілдіру бойынша жаңа тәсілдер әзірлеу
- Құрылыс кодексі аясында нормативтік актілерді 1 шілдеге дейін жаңарту
- құрылыс материалдарын өндіру бойынша 38 жаңа жобаны уақтылы іске қосу
Бұл жобалар құрылыс материалдарына сұранысты қамтамасыз етіп, бағаның өсуіне жол бермеуге және отандық өндірісті қолдауға бағытталған.
Жалпы бақылау мен үйлестіру Премьер-министрдің бірінші орынбасары Роман Склярға жүктелді.
