Қазақстанның Мысырдағы Елшісі Асқар Жеңіс Мысырдың Сыртқы істер, халықаралық ынтымақтастық және шетелдегі мысырлықтар істері жөніндегі министрінің орынбасары доктор Самар әл-Ахдальмен кездесу өткізді, деп хабарлайды DKNews.kz.
Кездесу барысында тараптар Қазақстан мен Мысыр арасындағы сауда-экономикалық және ғылыми-техникалық ынтымақтастықты дамыту мәселелерін талқылады.
Үкіметаралық комиссияның жаңа форматы қаралды
Тараптар 2026 жылғы ақпанда Мысыр үкіметінде жүргізілген ауқымды реструктуризацияны ескере отырып, Қазақстан–Мысыр үкіметаралық комиссиясы аясындағы жаңа ұйымдастырушылық механизмдерді қарастырды.
Кездесудің басты тақырыбы биыл Астанада өтуі жоспарланған Үкіметаралық комиссияның алтыншы отырысына дайындық болды.
Мысыр тарапының мәліметінше, үкімет құрылымындағы өзгерістерге байланысты комиссия қызметін енді тікелей сыртқы істер ведомствосы қадағалайды.
Аймақтық қауіпсіздік мәселелері талқыланды
Пікір алмасу барысында тараптар Таяу Шығыстағы аймақтық қауіпсіздік мәселелеріне де тоқталды.
Сондай-ақ осы тақырып бойынша екі елдің сыртқы істер министрлері арасында жақында өткен телефон арқылы сөйлесудің маңыздылығы атап өтілді.
Қазақстандағы референдум туралы ақпарат берілді
Кездесу барысында қазақстандық дипломат сұхбаттасын Қазақстанда 15 наурызға жоспарланған конституциялық референдумға дайындық барысымен таныстырды.
Екі ел диалогты жалғастыруға ниетті
Кездесу қорытындысы бойынша тараптар Үкіметаралық комиссия отырысын өткізу мерзімдерін жеделдетуге және тұрақты дамудың барлық бағыттары бойынша белсенді диалогты жалғастыруға мүдделі екендерін растады.
