Мемлекет басшысы Қасым-Жомарт Тоқаев барлық деңгейдегі мәслихат депутаттарының III республикалық форумында сөз сөйлеп, аймақтардың қаржылық дербестігін күшейту мәселесіне тоқталды, деп хабарлайды DKNews.kz.
Президенттің айтуынша, өңірлер өз бюджетін мұқият жоспарлап, табысын арттыруға ерекше мән беруі тиіс.
Ауылдық округтердің бюджеті өсіп келеді
Қасым-Жомарт Тоқаев жергілікті биліктің әлеуетін және аймақтардың қаржылық дербестігін біртіндеп күшейту жұмыстары жүргізіліп жатқанын атап өтті.
Былтыр ауылдық округтердің бюджеті 442 миллиард теңгеден асты. Бұл қаражаттың үштен бірі елді мекендердің өз табысы. Сонымен қатар еліміздегі ауылдық округтердің орташа бюджеті 190 миллион теңгеге жетті.
Президент бұл көрсеткішті аймақтардың қаржылық мүмкіндіктерінің артып келе жатқанын көрсететін маңызды нәтиже ретінде бағалады.
Ауылдарға жаңа табыс көздері беріледі
Биылдан бастап ауылдық округтер қосымша табыс көзіне ие болады. Атап айтқанда, кең таралған пайдалы қазбаларды өндіру, жерасты сулары мен емдік балшықтарды пайдалану бойынша салынатын салықтарды жергілікті деңгейде жинап, өз қажетіне жұмсай алады.
Жаңа салық түсімдері өңірлерге берілуі мүмкін
Мемлекет басшысының тапсырмасына сәйкес Үкімет қазір заңды тұлғалар мен жеке кәсіпкерлерге салынатын мүлік салығының бір бөлігін төртінші деңгейдегі бюджеттерге беру мәселесін пысықтап жатыр.
Сонымен қатар аймақтарға жекелеген қызмет түрлеріне арналған лицензиялық алымдардан және экологиялық айыппұлдардан түсетін қаражатты беру мүмкіндігі де қарастырылып жатыр.
Мәслихаттардың жауапкершілігі артады
Президенттің айтуынша, түскен табыс ең алдымен сол аймақтың дамуына жұмсалуы керек.
«Бұл – өте дұрыс ұстаным. Түскен табыс, ең алдымен, сол аймақты дамытуға жұмсалуы керек. Бір сөзбен айтқанда, жергілікті жерде қордаланған мәселелерді шешу үшін мүмкіндік те, ресурс та арта түспек», – деді Қасым-Жомарт Тоқаев.
Мемлекет басшысы мәслихаттарға жүктелетін негізгі міндеттің бірі – осы қаражаттың тиімді жұмсалуын қатаң бақылау екенін атап өтті.
