Қазақстанда медициналық көмектің сапасын басқарудың жаңа кезеңі басталмақ. Үкімет 2026–2030 жылдарға арналған кешенді жоспарды бекітті. Құжатқа Премьер-министр Олжас Бектенов қол қойды, деп хабарлайды DKNews.kz.
Бұл бастама Мемлекет басшысының «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауында берілген тапсырмаларды іске асыруға бағытталған.
Жаңа жоспардың басты ерекшелігі – медицина саласын деректерге, цифрлық құралдарға және жасанды интеллект технологияларына сүйене отырып басқару.
Медициналық қызмет сапасы қалай өзгереді
Жоспардың негізгі мақсаты – медициналық көмектің сапасын тұрақты түрде жақсарту, жүйенің ашықтығын арттыру және реттеудің тиімділігін күшейту.
Ең басты өзгерістердің бірі – пациенттің рөлін күшейту. Яғни болашақта пациент тек қызмет алушы емес, медициналық қызметтердің сапасын бағалау мен бақылау процесінің белсенді қатысушысына айналуы тиіс.
Бұл модель медициналық ұйымдардың жұмысына қоғамдық бақылауды күшейтеді.
Жүйені дамытудың төрт негізгі бағыты
Кешенді жоспар аясында денсаулық сақтау жүйесін жаңғыртудың төрт стратегиялық бағыты анықталған.
Олар: медициналық қызмет көрсету саласындағы реттеуші құралдарды жаңғырту, жасанды интеллект технологияларын қолдана отырып сапа сараптамасының жаңа моделін енгізу және Ұлттық сапа институтын құру, кәсіби медициналық қоғамдастық пен пациенттердің рөлін күшейту, сондай-ақ сапаны басқару жүйесін толық цифрлық трансформациядан өткізу.
Бұл бағыттар медицина саласын басқарудың жаңа моделін қалыптастыруға тиіс.
Жасанды интеллект медицинаға қалай көмектеседі
Алдағы жылдары медицина саласында жасанды интеллект белсенді қолданыла бастайды.
2028 жылға қарай медициналық көмектің сапасы мен көлемін бақылау жағдайларының кемінде 20 пайызы жасанды интеллект технологиялары арқылы жүзеге асырылмақ.
Сонымен қатар 2027 жылы сапа сараптамасының үш компонентті жаңа моделі енгізіледі.
Бұл жүйе медициналық қызметтердің сапасын бағалауды анағұрлым объективті әрі жедел етуге мүмкіндік береді.
Медициналық ұйымдарға жаңа талап қойылады
Жоспар аясында медициналық ұйымдарға қойылатын талаптар да күшейтіледі.
2028 жылдан бастап ТМККК және МӘМС жүйелері аясында қызмет көрсететін медициналық ұйымдар міндетті түрде аккредитациядан өтуі тиіс.
Аккредитациядан кейінгі мониторинг те толық цифрландырылып, медициналық мекемелердің жұмысы тұрақты бақылауда болады.
Жоспарға сәйкес, лицензиядан кейінгі мониторингпен медициналық ұйымдардың 70 пайызы қамтылады, ал олардың кемінде 80 пайызы жаңа стандарттар бойынша аккредиттелуі тиіс.
Сарапшыларға арналған цифрлық жұмыс орны пайда болады
Сапаны басқару жүйесі де айтарлықтай өзгереді.
Профилактикалық бақылау жүйесі енгізіліп, сарапшылар үшін автоматтандырылған жұмыс орны құрылады. Бұл сараптама жүргізу процесін жеңілдетіп, бақылауды анағұрлым тиімді етуге мүмкіндік береді.
Сонымен қатар лицензиядан кейінгі бақылау процестері де толық цифрландырылмақ.
Қазақстанда Ұлттық сапа институты құрылады
Жоспар аясында тағы бір маңызды бастама қолға алынады.
Денсаулық сақтауды дамытудың ұлттық ғылыми орталығы базасында Ұлттық сапа институты құрылады. Бұл институт әдіснамалық және талдамалық орталық ретінде жұмыс істейді.
Институт қызметі Дүниежүзілік денсаулық сақтау ұйымының техникалық қолдауымен жүзеге асады. Нәтижесінде Қазақстанда пациент қауіпсіздігі бойынша халықаралық деңгейде мойындалған үздік стандарттарды енгізу жоспарланып отыр.
Пациенттердің шағымына жедел жауап беріледі
Медицина саласында пациенттердің де рөлі күшейтіледі.
Жоспар бойынша пациенттерді қолдау қызметі цифрландырылып, азаматтардың өтініштері мен шағымдарына нақты уақыт режимінде жауап беру жүйесі енгізіледі.
Сонымен қатар кәсіби медициналық қауымдастықтар сапаны тәуелсіз сараптауға және дәрігерлердің клиникалық шешімдерін бағалауға белсенді тартылмақ.
Барлық медициналық стандарттар цифрландырылмақ
Жоспарға сәйкес, 2028 жылға дейін медициналық көмек көрсету стандарттары мен ережелері толық цифрлық форматқа көшіріледі.
Бұл дәрігерлердің жұмысын жеңілдетіп, медициналық қызметтердің сапасын бақылауды айтарлықтай жақсартуға мүмкіндік береді.
Сарапшылардың айтуынша, кешенді жоспар іске асқан жағдайда медициналық ұйымдардың ашықтығы артып, басқарушылық шешімдер нақты деректерге сүйене отырып қабылданатын болады.
Ал ең бастысы – пациенттердің қауіпсіздігі мен медициналық қызмет сапасы жаңа деңгейге көтеріледі.
