Жылыту маусымының өтуі мен алдағы жөндеу науқанына дайындық аясында Энергетика министрлігінің Мемлекеттік энергетикалық қадағалау және бақылау комитетінің төрағасы Ержан Ертаев Қостанай облысына жұмыс сапарымен барды, деп хабарлайды DKNews.kz.
Рудный ЖЭО-дағы жаңғырту жұмыстары
Комитет төрағасы Рудный ЖЭО-дағы қайта жаңғырту барысын тексерді. №1 қазандықтың монтажы аяқталуға жақын, ал №3 турбинаның генераторы ауыстырылуда. Қазандық бойынша монтаж жұмыстарын 30 наурызға дейін аяқтау жоспарланған, сәуір–маусымда іске қосу-реттеу жұмыстары жүргізіледі. Жаңартылған қазандық станцияның қуатын 30 МВт-қа арттыруға мүмкіндік береді. №3 турбина үшін ҚХР-дан жаңа генератор жеткізілген, оны тамызға дейін монтаждау жоспарлануда.
Алдағы күрделі жөндеу
Биыл Рудный ЖЭО-да бір қазандық агрегаты мен екі турбоагрегатты күрделі жөндеу жүргізу жоспарланған. Бұл энергетикалық жүйенің сенімділігін арттыруға бағытталған маңызды қадам.
Сарыбай МЭС және өңірлік жүйе
Ержан Ертаев «KEGOC» АҚ Сарыбай МЭС диспетчерлік орталығында болып, өңірдің энергия жүйесінің жедел сызбасымен, жоспарланған жөндеу жұмыстарымен және су тасқыны кезеңіне дайындық шараларымен танысты.
Энергетикалық кеңес
Жұмыс сапары аясында облыс әкімдігі өкілдері және өңірдегі энергетикалық кәсіпорындар – Қостанай ТЭК, Арқалық ЖЭО, Рудный ЖЭО, Рудный жылу желілері, ЭПК-Forfait, Межрегионэнерготранзит басшыларының қатысуымен кеңес өтті. Кеңесте проблемалық мәселелер қаралып, кәсіпорын басшыларының баяндамалары тыңдалды.
Су тасқынына дайындық
Кеңесте энергетикалық объектілердің су тасқыны кезеңіне дайындығы мен тиісті іс-шараларды іске асыруға ерекше назар аударылды.
«Жылыту маусымының тұрақты аяқталуын қамтамасыз ету және энергетикалық объектілерді алдағы жөндеу науқанына уақтылы дайындау маңызды. Барлық жұмыстар белгіленген мерзімде және энергия жүйесінің қауіпсіздігі талаптарын сақтай отырып жүргізілуі тиіс. Бұл өңірлерді тұрақты энергиямен қамтамасыз етуге тікелей әсер етеді», – деді Ержан Ертаев.
Жауапкершілік және бақылау
Комитеттің Қостанай облысы бойынша аумақтық департаментіне жылыту маусымының өтуін, жөндеу науқанына дайындықты және су тасқынына қарсы іс-шаралардың іске асырылуын тұрақты бақылауда ұстау тапсырылды.
