Оқу-ағарту министрі Жұлдыз Сүлейменова жұмыс сапарымен Қазақстанға келген Google for Education компаниясының Ұлыбритания, Еуропа және Орталық Азия бойынша директоры Анна Артемьевамен кездесті. Кездесуге сондай-ақ Білім беруді тұрақты дамыту қорының директоры Данияр Тоқтарбаев қатысты, деп хабарлайды DKNews.kz.
Тараптар білім беру жүйесін цифрлық трансформациялау, заманауи технологияларды енгізу және инновациялық ынтымақтастықты дамыту мәселелерін талқылады.
Жасанды интеллект – білім берудегі жаңа кезең
Министр еліміздің орта білім беру саласында жасанды интеллект технологияларын дамыту жоспарларымен бөлісіп, халықаралық тәжірибені енгізудің маңызын атап өтті.
«Біз Google компаниясын «Келешек мектептері» жобасы аясында бірлесе жұмыс жасауға шақырамыз. Ел аумағында Мемлекет басшысы Қасым-Жомарт Тоқаевтың тапсырмасымен 217 мектеп салынды. Сол мектептердің 84-і ауылдарда орналасқан. Сонымен қатар бізде шағын жинақты мектептер бар. Ауылдарда барлығы 6 мыңнан астам мектеп орналасқан. Қазір біз үшін стратегиялық басымдықтардың бірі ауыл мен қала мектептері арасындағы алшақтықты жою», – деді Жұлдыз Сүлейменова.
Google қандай шешімдер ұсынды?
Кездесу барысында Google компаниясының білім беру өнімдері таныстырылды, олардың қатарында Google Classroom, Gemini, Notebook LLM және жасанды интеллектке негізделген басқа да шешімдер бар, сондай-ақ Chromebook ноутбуктерін оқу процесінде қолданудың нақты сценарийлері көрсетілді.
Бұл құралдар оқу процесін жеңілдетіп, оны интерактивті әрі тиімді етуге мүмкіндік береді.
Digital Bala жобасы қалай жұмыс істейді?
Қазіргі таңда Google for Education Білім беруді тұрақты дамыту қоры және «Өрлеу» біліктілікті арттыру ұлттық орталығымен бірлесіп Digital Bala пилоттық жобасын іске асыруда, оның аясында мектептерде оқу процесін автоматтандыруға, мұғалімдер мен оқушылар арасындағы байланысты күшейтуге арналған IT-құралдар енгізілуде.
Ауыл мен қала арасындағы алшақтық
Министрлік үшін басты мақсаттардың бірі – ауыл және қала мектептері арасындағы білім сапасы айырмашылығын азайту, бұл бағытта цифрлық технологиялар негізгі құралдардың бірі ретінде қарастырылып отыр.
Неге бұл маңызды?
Бұл бастама білім беру жүйесін жаңа деңгейге көтеріп қана қоймай, оқушыларға заманауи дағдыларды меңгеруге мүмкіндік береді, сондай-ақ Қазақстанның цифрлық білім беру кеңістігін қалыптастыруға ықпал етеді.
