2026 жылғы Наурыз мейрамы Алматыда бұрын-соңды болмаған ауқымда өтті. Бұл мереке дәстүр мен заманауи технологияның үйлесімі ретінде қала тұрғындары мен қонақтарына ұмытылмас әсер қалдырды. 200-ден астам іс-шара ұйымдастырылып, оған 800 мыңнан астам адам қатысты. Ал онлайн аудитория 3 миллионнан асып, Алматының мерекелік атмосферасын бүкіл әлемге танытты, деп хабарлайды DKNews.kz.
Жас таланттарды қолдау
Бұл Наурыз мейрамында жас таланттарға ерекше басымдық берілді. Қала сахналарында танымал артистермен қатар оқушылар, студенттер және жас орындаушылар да өнер көрсетті. Алматыда мейрамды ұйымдастыруға 500-ге жуық мәдениет және өнер қайраткері қатысты.
Мерекелік орталықтар
Мерекенің негізгі орталықтары «Астана» және «Абай» алаңдары, Панфилов жүргіншілер көшесі, «Арбат», «Атакент» аумағы, Тұңғыш Президент саябағы және Алматы ипподромы болды. Қала бойынша шамамен 100 киіз үй тігіліп, әрқайсысы дәстүр мен инновацияны ұштастыратын дербес кеңістікке айналды.
«Астана» алаңының ерекшеліктері
«Астана» алаңында алты киіз үйден тұратын ерекше экспозиция ұсынылды. Онда ұлттық музыкалық аспаптар, археологиялық реконструкциялар мен этнодизайн үлгілері, сондай-ақ роботтар, дрондар және жасанды интеллект технологиялары таныстырылды. Digital 360 кеңістігі арқылы қала тұрғындары мен қонақтары Алматының әр кезеңдегі келбетін панорамалық проекциялар арқылы тамашалады. Бұл алаңда өткен концерттерде жас орындаушылар өнер көрсетті, олардың қатарында Сая Махамбет, Айдар Әбдірахманов, Дастан Тұрдәлі, Әмина Әбділбекова және басқа да талантты жастар болды.
Цифрлық трансформация
Наурыз-2026 мерекесінің басты ерекшеліктерінің бірі цифрлық трансформация болды. Қалада жеті түрлі жоба жүзеге асып, оның ішінде LED-туннель мен мультимедиялық концерттер де болды. Панфилов көшесінде 175 шаршы метр ауданды қамтитын LED-туннель орнатылып, онда жасанды интеллект көмегімен жасалған визуалды контент көрсетілді.
Интерактивті форматтар мен KitapFest-2026
«Арбатта» өткен KitapFest-2026 фестивалінде Smart-киіз үй жұмыс істеді. Бұл аймақта сирек кітаптар, VR-аймақтар, AI-фотоаймақ және көне басылымдарды қалпына келтіру үдерісі ұсынылды. Фестиваль екі күн ішінде 40 мыңнан астам адамды тартты және 15 мыңнан астам кітап сатылды.
Әлемдік рекордтар мен этнофестиваль
Мерекенің маңызды бөлігі — Тұңғыш Президент саябағында орнатылған әлемдік рекорд. Биіктігі 11 метр, диаметрі 20 метр болатын ең үлкен шаңырақ көтеріліп, оның астына ұзындығы 100 метрден асатын сырлы сырмақ төселді. Алматы ипподромында өткен этнофестивальде көкпар, жамбы ату, ат үстіндегі акробатика сияқты ұлттық спорт түрлері көрсетілді. Сондай-ақ, түйе үстінде отырып, 10 секунд ішінде төрт нысананы дәл көздеп ату арқылы әлемдік рекорд орнатылды.
Мерекенің халықаралық өлшемі
Абай алаңында ТҮРКСОЙ ұйымының қолдауымен Түркия, Әзірбайжан, Өзбекстан, Қырғызстан, Тәжікстан және Қазақстан шеберлерінің қатысуымен түркі халықтарының көрме-жәрмеңкесі өтті. Сонымен қатар, «Әлемді таңғалдырған әжелер» жобасы аясында 60 жастан асқан әйелдер ұлттық киімдердің заманауи үлгілерін таныстырған сән көрсетілімі ұйымдастырылды.
«Наурыз шоу» және мәдени шаралар
«Алатау» дәстүрлі өнер театры алдындағы алаңда 700 орындық көшпелі цирк-шапито орнатылып, халықаралық деңгейдегі артистер қатысқан «Наурыз шоу» бағдарламасы ұсынылды. Сонымен қатар, қала бойынша жеті гала-концерт өтті, онда көптеген жас орындаушы алғаш рет үлкен сахнаға шықты.
«Тазару күні» және экологиялық шаралар
Наурызнаманың маңызды бөліктерінің бірі — «Тазару күні». Бұл күн аясында өткен сенбіліктерге 10 мыңнан астам адам қатысып, 2 мыңнан астам техника жұмылдырылды. Нәтижесінде 2 мың текше метрден астам қалдық шығарылып, 2 мыңнан астам ағаш пен бұта отырғызылды.
«Nauryz Sale» қалалық акциясы
Мереке кезінде Алматыда «Nauryz Sale» қалалық акциясы ұйымдастырылды. Бұл акцияға 500 мыңнан астам адам қатысты, әрі қала тұрғындары мен қонақтары ерекше жеңілдіктермен тауарлар сатып алды.
