Жамбыл облысы Байзақ ауданының Жетібай ауылының тұрғындары «Мөлдір бұлақ» экологиялық акциясына белсене қатысты. Жергілікті ақсақалдардың бастамасымен ауыл тұрғындары жақын маңдағы бұлақ көздерінің аумағын тазалап, абаттандыру жұмыстарын жүргізді, деп хабарлайды DKNews.kz.
Акцияға мектеп оқушылары да қатысқан
Акцияға Су ресурстары және ирригация министрлігінің бастамасымен құрылған «Болашақтың қайнары» атты су саласындағы алғашқы еріктілер қозғалысына қабылданған жергілікті мектеп оқушылары да қосылды. Іс-шара барысында бұлақ көздерінің табиғи арнасы ашылып, қалпына келтірілді. Аумақ қоқыстан тазартылып, жаңа көшеттер отырғызылды.
Ауыл тұрғындарының экологияға деген жауапкершілігі
Жетібай ауылының ақсақалдар кеңесінің төрағасы Марат Қошқарбаев акция туралы былай деді:
«Ауыл тұрғындары «Мөлдір бұлақ» акциясы туралы жаңалықтар мен әлеуметтік желілерден білді. Осыны естіген соң, жастарға үлгі көрсету үшін белсенді қатысуға шешім қабылдадық. Біздің ауылдың өзі бұлақтардың ортасында орналасқан, сондықтан су көздерін сақтау біз үшін ерекше маңызды. Бұл акцияның тәрбиелік мәні өте жоғары. Біз осы арқылы жастарға табиғатты қорғау, экологиялық мәдениетті қалыптастыруды үйретеміз. Бұл жер алдағы уақытта ауылдың көрікті орталықтарының біріне айналады деп сенеміз.»
Табиғатты қорғау — ұлттық мұра
Қалмахан Бекмағамбетов, Жетібай ауылының ақсақалы, акцияның мәні туралы былай деді:
«Қазақ халқы ежелден-ақ су көзін таза ұстауды, оны ластамауды дәстүрге айналдырған. Бұл – ата-бабадан қалған аманат. Біз – аға буын, сол дәстүрді кейінгі ұрпаққа жеткізуіміз керек. Бұл тек экология емес, тәрбие құралы. Табиғатты сақтау – ұрпаққа қалдыратын ең үлкен мұра.»
«Таза Қазақстан» бастамасы аясындағы акция
«Мөлдір бұлақ» экологиялық акциясы Мемлекет басшысының «Таза Қазақстан» бастамасы аясында Су ресурстары және ирригация министрлігі тарапынан ұйымдастырылды. Акцияның алғашқы кезеңі биыл наурыз айында Алматы, Жамбыл, Қызылорда, Түркістан, Жетісу облыстарын және Шымкент қаласын қамтыды. Бұл бастама табиғатқа деген жауапкершілікті арттыруды және экологиялық мәдениетті насихаттауды көздейді.
