Түркістан облысында Қазақстан және Өзбекстан мамандарының қатысуымен үйірлі шегірткеге қарсы бірлескен мониторинг жұмыстары өтті. Делегациялар өңірдегі фитосанитариялық жағдайды бақылап, зиянкестерге қарсы жүргізіліп жатқан шаралармен танысты, деп хабарлайды DKNews.kz.
Өзбекстаннан келген жұмыс тобы Түркістан облысында марокко шегірткесіне қарсы жүргізіліп жатқан химиялық өңдеу жұмыстарының барысын көрді.
Сарыағаш пен Қазығұрттағы жұмыстар тексерілді
Бірлескен мониторинг аясында делегация мүшелері Сарыағаш және Қазығұрт аудандарында болды.
Мамандар:
- қорғаныс іс-шараларын ұйымдастыру барысымен;
- қолданылып жатқан технологиялармен;
- пайдаланылатын химиялық препараттармен;
- ауыл шаруашылығы алқаптарын өңдеуге жұмылдырылған арнайы техникамен танысты.
Кездесу барысында тараптар шегіртке зиянкестерінің таралуының алдын алу мәселесіне ерекше назар аударды.
Шекара маңындағы аумақтарды қорғау мәселесі талқыланды
Жиында егіс алқаптарын қорғау және шекара маңындағы аумақтарда бірлескен іс-қимылдарды үйлестіру мәселелері сөз болды.
Қатысушылардың айтуынша, фитосанитариялық қауіпсіздікті қамтамасыз ету үшін көрші елдердің мамандары арасында жедел ақпарат алмасу маңызды.
Сондай-ақ практикалық тәжірибе бөлісу шегірткеге қарсы күрестің тиімділігін арттыруға мүмкіндік беретіні атап өтілді.
Мониторинг жұмыстары Өзбекстанда жалғасады
Тәжірибе алмасу және фитосанитариялық ахуалды бақылау жұмыстары алдағы уақытта Өзбекстан аумағында жалғасады.
Мамандар мұндай бірлескен шаралар ауыл шаруашылығы алқаптарын қорғауға және зиянкестердің жаппай таралу қаупін азайтуға ықпал ететінін айтты.
