Мемлекет басшысының Қазақстанның көліктік-логистикалық әлеуетін дамыту жөніндегі тапсырмалары аясында Бейнеу – Маңғыстау теміржол учаскесін жаңғырту жобасы жүзеге асырылып жатыр, деп хабарлайды DKNews.kz.
Ауқымды жоба магистральдық инфрақұрылымды жаңартуға, өткізу қабілетін арттыруға және пойыздар қозғалысының қауіпсіздігі мен тұрақтылығын қамтамасыз етуге бағытталған.
Негізгі құрылыс жұмыстары жалғасуда
Қазіргі уақытта теміржол бойындағы разъездердің басым бөлігінде негізгі жер жұмыстары аяқталған.
Жоба аясында:
- рельс-шпал торын төсеу жұмыстары жүргізілуде
- жолдарды балластау жалғасуда
- бағыттауыш бұрмаларды орнату аяқталды
- темірбетон су өткізу құбырлары ұзартылды
Мамандар барлық жұмыстарды бекітілген өндірістік кестеге сәйкес орындап жатыр.
№12 разъезде жаңа көпір салынып жатыр
Жобаның маңызды нысандарының бірі – №12 разъездегі көпір құрылысы.
Бүгінгі таңда:
- көпірдің негізі дайындалды
- іргетас элементтері орнатылды
- темірбетон тіреулер монтаждалды
- қалыптарды орнату жұмыстары жүргізілді
Құрылыс жұмыстары жоспарға сәйкес жалғасып жатыр.
Байланыс және басқару жүйелері жаңартылуда
Теміржол қозғалысының қауіпсіздігін қамтамасыз ету мақсатында дабыл беру, орталықтандыру және бұғаттау жүйелерін жаңарту жұмыстары да қатар жүргізілуде.
Атап айтқанда:
- магистральдық кабельдерді төсеу аяқталды
- талшықты-оптикалық байланыс желілері жүргізілді
Қазіргі уақытта мамандар:
- кабельдерді сынақтан өткізуде
- жалғағыш және тармақтағыш муфталарды орнатуда
- жол жәшіктерін монтаждауда
- блок-учаскелерді іске қосуға дайындық жүргізуде
Өткізу қабілеті едәуір артады
Жоба толық аяқталғаннан кейін Бейнеу – Маңғыстау учаскесінде қабылдау-жөнелту жолдарының инфрақұрылымы жаңартылып, қозғалысты ұйымдастыру жүйесі жетілдіріледі.
Нәтижесінде:
- тасымал қауіпсіздігі артады
- пойыз қозғалысының тұрақтылығы жақсарады
- өңірдегі теміржол қатынасының тиімділігі күшейеді
- жүк және жолаушылар тасымалының мүмкіндігі кеңейеді
Ең бастысы, учаскенің өткізу қабілеті тәулігіне 12 жұп пойыздан 17 жұп пойызға дейін ұлғаяды.
Бұл неге маңызды?
Бейнеу – Маңғыстау бағыты Қазақстанның батыс өңіріндегі маңызды көлік дәліздерінің бірі саналады. Оның жаңғыртылуы өңірдің логистикалық мүмкіндіктерін арттырып қана қоймай, халықаралық және ішкі жүк тасымалдарының тиімділігін күшейтуге ықпал етеді.
Жобаның жүзеге асырылуы көлік инфрақұрылымын жаңғырту жөніндегі мемлекеттік саясаттың маңызды бөлігі болып табылады. Жаңғырту жұмыстарын 2026 жылдың соңына дейін аяқтау жоспарланып отыр.
