Алматыда Екінші дүниежүзілік соғыстың ардагері Александр Степанович Журавлев 101 жасқа толды.
Майдан даласында байланысшыдан барлаушыға дейінгі жолдан өткен, Берлин түбінде Жеңіс күнін қарсы алған қарияны туған күнімен әскери қызметшілер арнайы барып құттықтады, деп хабарлайды DKNews.kz.
Бостандық аудандық қорғаныс істері жөніндегі басқармасының әскери қызметшілері ардагердің шаңырағына барып, оған Қазақстан Республикасы Қорғаныс министрінің құттықтау хатын табыстады. Қонақтарды аудандық қорғаныс істері жөніндегі басқарманың бастығы полковник Арман Тұрғанбаев бастап барды.
Бүгінде ғасырдан асқан ғұмыр кешіп отырған майдангердің өмір жолы тұтас бір дәуірдің тарихымен астасып жатыр. Оның тағдыры соғыс жылдарындағы ауыр сынақтарды, майдандағы ерлікті және бейбіт өмірді қалпына келтіру кезеңін қамтиды.
Полковник Арман Тұрғанбаев ардагерге алғыс айтып, оның ерлігі кейінгі ұрпақ үшін мәңгілік үлгі екенін атап өтті.
– Отанға адал қызмет етіп, көрсеткен ерлігіңіз бен жанқиярлығыңыз үшін алғыс айтамыз. Бейбіт өмірді қорғап, Жеңіске қол жеткізген аға буынның ерлігін ұмытпай, олардың жарқын есімін ұлықтау – біздің парызымыз, – деді полковник Арман Тұрғанбаев.
Кездесу барысында Александр Степанович соғыс жылдарындағы естеліктерімен бөлісіп, көрсетілген құрмет пен қамқорлық үшін ризашылығын білдірді.
Карель майданынан Берлинге дейін
Александр Журавлев 1925 жылғы 30 мамырда Алтай өлкесінің Барнауыл қаласында дүниеге келген. 1943 жылы Новосібірдегі жоғары оқу орнында білім алып жүрген кезінде әскер қатарына шақырылады.
Алғашында байланысшы-телефоншы ретінде қызмет атқарған ол кейін артиллериялық бөлімшеде барлаушы болады. Майдандағы жауапты тапсырмаларды орындап, бір жылдан кейін Украина жерін азат ету операцияларына қатысады. Сондай-ақ тарихи Эльба өзенінен өту операциясының құрамында болды.
Жеңіс күнін Александр Степанович Берлин түбінде қарсы алды. Алайда оның әскери жолы мұнымен аяқталған жоқ. Соғыстан кейін тағы бес жыл бойы Будапешт пен Дағыстанда әскери қызметін жалғастырды.
Әскер қатарынан запасқа шыққан соң инженер-құрылысшы мамандығын таңдап, елдің бейбіт дамуына өз үлесін қосты.
Ерлік пен еңбектің иесі
Майдандағы батылдығы үшін Александр Журавлев І дәрежелі Отан соғысы орденімен, «Жауынгерлік еңбегі үшін», «Берлинді алғаны үшін» және «Праганы алғаны үшін» медальдарымен марапатталған.
Ал бейбіт өмірдегі еңбегі де елеусіз қалған жоқ. Көпжылдық кәсіби қызметі үшін ол «Құрмет» орденіне ие болды.
Бүгінде Александр Степановичтің өмір жолы – тек бір адамның тағдыры ғана емес, Жеңісті жақындатқан тұтас буынның тарихы. Осындай ардагерлердің әрбір кездесуі мен естелігі өткенді ұмытпауға, бейбіт күннің қадірін тереңірек түсінуге мүмкіндік береді.
