Он жыл өтсе де, Ақтөбедегі қанды оқиғалар халық жадынан өшкен жоқ. Террористік шабуыл кезінде әскери антқа адал болып, соңғы деміне дейін Отан қауіпсіздігі үшін күрескен Ұлттық ұлан жауынгерлерінің ерлігі бүгінде де құрметпен еске алынады, деп хабарлайды DKNews.kz.
5 маусым күні Астана қаласындағы 5573 әскери бөлімінде 2016 жылғы Ақтөбе оқиғасы кезінде қызметтік борышын орындау барысында қаза тапқан әскери қызметшілерді еске алу рәсімі өтті.
Іс-шараға әскери бөлімнің офицерлері, сержанттары мен сарбаздары қатысып, ерлікпен қаза тапқан қаруластарының рухына тағзым етті. Жиналғандар олардың батырлығы мен жанқиярлығын бір минут үнсіздікпен еске алып, әскери антқа адалдықтың жарқын үлгісі ретінде құрмет көрсетті.
Ақтөбедегі қайғылы күн
2016 жылдың 5 маусымы Қазақстан тарихындағы ең ауыр күндердің бірі ретінде есте қалды. Ақтөбе қаласында болған террористік шабуыл кезінде қауіпсіздік күштері ел тыныштығын сақтау үшін күрес жүргізді. Сол шайқаста Ұлттық ұланның бірнеше әскери қызметшісі ерлікпен қаза тапты.
Олардың қатарында майор Даниэль Майлыбаев, кіші сержант Берікжан Қалиев және қатардағы жауынгер Досбол Сапар болды. Олар әскери борышын ақтық демі қалғанша абыроймен орындап, өз өмірлерін Отан қауіпсіздігі жолында құрбан етті.
Ерлік туралы жаңа буынға айтылды
Еске алу шарасы аясында әскери қызметшілерге Ақтөбе оқиғаларының мәні мен қаза тапқан жауынгерлердің ерлігі туралы кеңінен ақпарат берілді. Тәрбие сағаттары мен арнайы кездесулер ұйымдастырылып, жас сарбаздарға олардың өмір жолы мен қызметі таныстырылды.
Мұндай кездесулердің негізгі мақсаты – жастардың бойында патриоттық рухты күшейту, әскери антқа адалдық пен қызметтік жауапкершілік сезімін қалыптастыру.
«Олардың есімі мәңгілік сапта қалады»
Еске алу жиынында 5573 әскери бөлімінің командирі полковник Жандар Әшірбеков сөз сөйлеп, қаза тапқан жауынгерлердің ерлігі ешқашан ұмытылмайтынын атап өтті.
— Ақтөбе оқиғалары — Ұлттық ұлан тарихындағы ең ауыр әрі тағылымы терең күндердің бірі. Сол күні қаруластарымыз әскери антқа адалдықтың үлгісін көрсетіп, Отан қауіпсіздігі үшін өз өмірлерін қиды. Олардың ерлігі мен жанқиярлығы келер ұрпаққа үлгі болып қала береді. Біз олардың жарқын ерлігін әрдайым есте сақтап, кейінгі буынға жеткізуге міндеттіміз. Қаза тапқан жауынгерлердің есімдері Ұлттық ұланның мәңгілік сапында қалады, — деді әскери бөлім командирі.
Ерлік ұмытылмайды
Уақыт өткен сайын тарихи оқиғалардың маңызы арта түседі. Ақтөбе оқиғасында қаза тапқан жауынгерлердің ерлігі бүгінде әскери қызметкерлер үшін ғана емес, бүкіл қоғам үшін жауапкершілік пен отансүйгіштіктің символына айналды.
Олардың есімі әскери бөлімдердің тарихында ғана емес, халық жадында да мәңгі сақталады. Себебі бейбіт күннің бағасы кейде осындай ерлердің жанқиярлығымен өлшенеді.
