Қазақстанның саяси алаңында жаңа кезең басталғалы тұр. «Әділет» партиясы елдің барлық өңірінде филиалдар құру туралы шешім қабылдап, өңірлік желіні қалыптастыруға ресми түрде кірісті.
Сарапшылардың пікірінше, бұл қадам партияның қағаз жүзіндегі ұйымнан нақты саяси институтқа айналу жолындағы маңызды белес болуы мүмкін, деп хабарлайды DKNews.kz.
«Әділет» партиясының II Съезінде қабылданған шешімге сәйкес, партияның филиалдары Қазақстанның барлық облыстарында және республикалық маңызы бар қалаларда құрылып, есептік тіркеуден өтеді. Сонымен қатар делегаттар «Әділет» партиясы филиалы туралы ережені де бірауыздан мақұлдады.
Бұл шешім партияның тек орталық деңгейде ғана емес, өңірлерде де жүйелі жұмыс жүргізуге ниетті екенін көрсетеді. Себебі кез келген саяси ұйымның нақты ықпалы азаматтармен тікелей жұмыс барысында қалыптасады.
Партия Саяси кеңесі Бюросының мүшесі және съезд хатшысы Гүлзира Атабаева қабылданған құжаттың маңызын ерекше атап өтті.
«Филиал туралы ереже – партияның өңірлердегі жұмысы қалай ұйымдастырылатынын, аумақтық құрылымдардың қалай қалыптасатынын, жергілікті жерлерде шешімдердің қалай қабылданатынын, сондай-ақ тәртіп, бақылау және жауапкершілік қалай қамтамасыз етілетінін айқындайтын негізгі құжаттардың бірі», – деді Гүлзира Атабаева.
Оның айтуынша, филиалдар аумақтық қағидат бойынша құрылып, біртұтас партиялық жүйенің құрамында жұмыс істейді. Бұл өңірлердегі қызметті бірыңғай стандарттар негізінде ұйымдастыруға мүмкіндік береді.
Өңірлердегі жұмыс – партияның басты сынағы
Съезд барысында партия өкілдері өңірлік құрылымдардың маңызын бірнеше рет атап өтті. Өйткені азаматтардың сенімі мен қоғамдық қолдау ең алдымен жергілікті деңгейде қалыптасады.
Партия Саяси кеңесінің мүшесі Бурихан Нұрмұхамедов мемлекеттік тіркеу кезеңі аяқталғаннан кейін ұйымның негізгі назары өңірлердегі практикалық жұмысқа ауысатынын айтты.
«Партияның болашағы өңірлердегі жұмыстың нәтижесіне тікелей байланысты. Азаматтардың сенімі де дәл сол жерде қалыптасады. Халық партияны нақты істері, бастамалары мен нәтижелері арқылы бағалайды. Сондықтан өңірлік құрылымдарды нығайту біздің басты міндеттеріміздің бірі болып табылады», – деді Бурихан Нұрмұхамедов.
Сарапшылар да соңғы жылдары қазақстандық сайлаушылардың нақты нәтиже көрсеткен ұйымдарға көбірек назар аудара бастағанын айтып келеді. Сондықтан өңірлік инфрақұрылымның қалыптасуы партияның алдағы саяси салмағына тікелей әсер етуі мүмкін.
Жастар да өңірлік желінің маңызын атап өтті
Съезде сөз сөйлеген «Дала Қырандары» жастар патриоттық қозғалысының өкілі Мәди Рымжанов халықпен тұрақты байланыс орнату кез келген партияның негізгі артықшылығы екенін айтты.
«Кез келген саяси ұйымның шынайы күші оның халықпен бірге бола алуымен, олардың сұраныстарын естуімен және еліміздің әр өңірінде олардың мүдделерін тиімді білдіре алуымен айқындалады», – деді Мәди Рымжанов.
Оның пікірінше, өңірлердегі белсенді жұмыс партияның қоғамдық қолдауын күшейтіп қана қоймай, азаматтардың күнделікті мәселелерін шешуге де ықпал етеді.
Ашықтық пен есептілікке басымдық беріледі
Жаңа ережеде ашықтық, есептілік және ішкі бақылау мәселелеріне ерекше көңіл бөлінген. Құжатқа сәйкес, өңірлік бөлімшелер қабылдайтын шешімдердің жариялылығы қамтамасыз етіліп, партия мүшелері мен қоғам алдындағы жауапкершілік қағидаттары сақталуы тиіс.
Партия Саяси кеңесінің мүшесі Дмитрий Павленконың айтуынша, өңірлік желі орталық пен азаматтар арасындағы байланысты күшейтеді.
«Партияның өңірлік желісі орталық пен жергілікті жерлердегі азаматтар арасындағы тікелей байланысты қамтамасыз етеді. Бұл кез келген саяси күштің тұрақты дамуы мен тиімді жұмысының берік негізі болып табылады», – деді Дмитрий Павленко.
Дауыс беру қорытындысы бойынша съезд делегаттары партия филиалдарын құру туралы шешімді қолдап, «Әділет» партиясы филиалы туралы ережені ресми түрде бекітті.
Осылайша, «Әділет» партиясы ұйымдық қалыптасудың келесі кезеңіне қадам басты. Ендігі басты міндет – қабылданған шешімдерді нақты іске асырып, өңірлерде тиімді жұмыс істейтін құрылымдарды қалыптастыру.
