Алматыда жол қозғалысы ережелерін ең мұқият сақтайтын жүргізушілер марапатталды. Алматы қаласының полициясы, Sergek Group және Freedom компаниясы тәртіптілігімен ерекшеленген он автокөлік иесіне КАСКО сақтандыру полистерін табыстады, деп хабарлайды DKNews.kz.
Марапат иелері бір жыл ішінде қала көшелерінде белсенді көлік жүргізіп, әрқайсысы 20 мың шақырымнан астам жол жүрген. Осы кезеңде олардың көліктері бойынша бейне және фотофиксация жүйелері бірде-бір жол ережесін бұзу дерегін немесе айыппұлды тіркемеген.
Ережені сақтау – күнделікті әдет
Жеңімпаздарды анықтау кезінде Sergek ITS интеллектуалды көлік жүйесінің деректері пайдаланылды. Жүйе жол қозғалысын бақылауға, талдауға және басқаруға мүмкіндік береді.
КАСКО сертификатын алғашқылардың бірі болып алған Ұлболсын Қайыпбергенова көлікті бес жылдан бері жүргізіп келеді. Оның айтуынша, жолдағы басты қағидасы – асықпай, ережені сақтау.
«Мен әрдайым жол ережелерін сақтауға тырысамын, тәртіп бұзбаймын, басқа көліктердің жолын кеспеймін. Озуға әуес емеспін, ереже бұзғанша жол бергенді жөн көремін. Осындай сыйлық үшін рақмет, бұл мен үшін өте жағымды тосынсый болды».
Тағы бір марапат иесі Евгений Мамроцкий соңғы бір жылдың өзінде 28 мың шақырымнан астам жол жүрген. Оның пікірінше, мұндай бастамалар жауапты жүргізушілердің еңбегін бағалап қана қоймай, өзгелерге де үлгі болады.
«КАСКО – өзі қымбат сақтандыру полисі, сондықтан бір жылға осындай бонус алу өте жағымды. Бұл басқа жүргізушілерге де жақсы үлгі болады деп сенемін. Менің ойымша, бәрі жүргізушінің өзіне байланысты: егер ереже бұзбауға дағдылансаң, сені марапаттаса да, марапаттамаса да солай жүре бересің. Қазіргі таңда бейнебақылау камераларының маңызы зор. Олар жолдардағы жағдайды және қоғамдық тәртіпті бақылауға көмектеседі».
Алматы жолдарындағы жағдай қандай?
Алматы қаласы полиция департаментінің ресми өкілі Салтанат Әзірбек мегаполистегі көлік ағынының өте жоғары екенін айтты.
Қазіргі таңда Алматыда ресми түрде 750 мың автокөлік тіркелген. Бұған қоса күн сайын қалаға өзге өңірлерден тағы 350-400 мың көлік кіреді. Мұндай жағдайда әрбір жүргізушінің жауапкершілігі ерекше маңызды.
Жыл басынан бері Алматы жолдарында жол қозғалысы ережелерін бұзудың 1 миллионнан астам дерегі тіркелген.
Ең жиі кездесетін құқықбұзушылықтар:
- Бағдаршамның тыйым салатын сигналына өту;
- Жылдамдықты арттыру;
- Жол белгілері мен таңбалау талаптарын бұзу;
- Қоғамдық көлікке арналған жолақпен жүру.
«Алматы – ресми түрде 750 мың автокөлік тіркелген ірі мегаполис. Арнайы талдау көрсеткендей, бұдан бөлек қала көшелерінде күн сайын басқа өңірлерден келген тағы 350-400 мың автокөлік қатынайды. Бұл жол қозғалысы жағдайын айтарлықтай күрделендіреді. Сондықтан жол қозғалысының әрбір қатысушысы жол қауіпсіздігі үшін жеке жауапкершілігін сезінуі тиіс. Жыл басынан бері Алматы жолдарында жол қозғалысы ережелерін бұзудың 1 миллионнан астам дерегі тіркелді. Ең жиі кездесетін құқықбұзушылықтар – бағдаршамның тыйым салатын сигналына өту, жылдамдықты арттыру, жол белгілері мен таңбалау талаптарын бұзу, сондай-ақ қоғамдық көлікке арналған жолақпен жүру. Сонымен қатар тәртіптілігімен өзгелерге үлгі болатын жүргізушілердің бар екені қуантады. Sergek компаниясы және Freedom сақтандыру компаниясымен бірлесіп өткізілген бұл акция басқа автокөлік иелері үшін де жақсы ынталандыру бола алады. Біз жүргізушілерді көбіне айыппұл арқылы тәртіпке шақыруға тырысқанымызбен, заңға бағынатын мінез-құлықты марапаттау тәжірибесі де тиімді екенін көрсетіп отыр. Бұл – біз енгізуге ұмтылатын халықаралық тәжірибе. Осындай жағымды бастамалар мұқият әрі жауапты жүргізушілерді ынталандыруы тиіс».
100 миллион теңгелік сақтандыру қорғанысы
Freedom компаниясы акция аясында 10 КАСКО сертификатын ұсынды. Сақтандыру өтемдерінің жалпы көлемі шамамен 100 миллион теңгені құрайды.
Автокөлік иелері сертификаттарын 1 шілдеге дейін іске қосуы қажет.
Freedom Insurance басқарма төрағасы Азамат Керімбаевтың айтуынша, КАСКО сақтандыруы тек жол-көлік оқиғалары кезінде ғана емес, табиғи құбылыстардан немесе үшінші тұлғалардың әрекетінен келген залалды да өтейді.
«Бұл акцияға тағы да қатысқанымызға өте қуаныштымыз. КАСКО полисі – кез келген автокөлік иесі үшін сенімді сақтандыру құралы. Әсіресе көлікке зақым келтіру қаупі жоғары ірі қалаларда оның маңызы зор. КАСКО тек жол-көлік оқиғаларынан кейін ғана емес, сондай-ақ қатты бұршақтан, нөсер жаңбырдан немесе шатырдан мұздың құлауынан болған зақымдарды да өтейді. Сонымен қатар оқиға орнынан кетіп қалған белгісіз тұлғаның келтірген шығыны да сақтандыру жағдайына жатады. Осындай жағдайларда КАСКО күтпеген жөндеу шығындарын өтеп, көлік иесінің бюджетін сақтауға көмектеседі».
Жазалаудан ынталандыруға көшу
Sergek Group компаниясының CEO-сы Евгений Ким жол қауіпсіздігін арттыру үшін тек бақылау мен айыппұлдың жеткіліксіз екенін айтты.
Оның пікірінше, жол ережелерін ұзақ уақыт бойы бұзбайтын жүргізушілерді марапаттау қоғамдағы жүргізу мәдениетін жақсартады.
«Біз әдетте бақылау технологияларын жазалау құралы ретінде қабылдаймыз. Алайда Sergek ITS деректері мәселенің екінші қырын да көрсетеді – жүздеген мың жүргізуші жылдар бойы бірде-бір құқықбұзушылықсыз көлік жүргізіп келеді. Дәл осындай жүргізушілерді марапаттау арқылы назарды жазалаудан ынталандыруға аударамыз. Соның нәтижесінде мұқият жүргізу ерекшелік емес, өзгелер үлгі алатын қалыпты мінез-құлыққа айналады. Қауіпсіз жүргізу мәдениеті дәл осындай оң ынталандыру арқылы қалыптасады. Осы маңызды акцияны тағы да қолдаған тұрақты серіктестеріміз – Freedom компаниясының сақтандырушыларына алғысымды білдіремін».
Бұл бастаманың маңызы қандай?
Әлемнің көптеген елдерінде жол қауіпсіздігі тек айыппұлдар мен шектеулер арқылы емес, жауапты жүргізушілерді көтермелеу арқылы да қамтамасыз етіледі. Франция, Канада және Біріккен Араб Әмірліктерінің тәжірибесі мұндай тәсілдің тиімді екенін көрсетіп отыр.
Сарапшылардың пікірінше, жүргізушілер өз тәртібінің бағаланатынын көрген сайын жолдағы мәдениет те жоғарылайды. Бұл өз кезегінде жол-көлік оқиғаларының азаюына және қауіпсіз ортаның қалыптасуына ықпал етеді.
