Маңғыстау облысы бойынша Мемлекеттік кірістер департаментінде тұрғындар, кәсіпкерлер және қоғам өкілдерінің қатысуымен ашық диалог форматындағы кезекті кездесу өтті. Іс-шара барысында салық заңнамасындағы соңғы өзгерістер түсіндіріліп, қатысушылар өздерін қызықтырған сұрақтарға жауап алды, деп хабарлайды DKNews.kz.
Кездесу 25 маусым күні Ақтау қаласы бойынша Мемлекеттік кірістер басқармасында Қазақстан Республикасы Салық кеңесшілері палатасы мен Маңғыстау облысы бойынша Мемлекеттік кірістер департаментінің мамандарының қатысуымен ұйымдастырылды.
Ұлттық тауарлар каталогымен жұмыс тәртібі түсіндірілді
Кездесудің негізгі тақырыптарының бірі – Ұлттық тауарлар каталогы (ҰТК) болды.
Мамандар қатысушыларға:
- тауар карточкаларын тіркеу тәртібін;
- NTIN кодтарын алу жолдарын;
- электронды шот-фактуралармен интеграциялау ерекшеліктерін;
- 2026 жылдың шілдесіне дейін жалғасатын айыппұлсыз сынақ кезеңін түсіндірді.
Сондай-ақ бизнес өкілдеріне құжаттарды рәсімдеу кезінде жиі кездесетін қателіктерден қалай сақтануға болатыны және бірыңғай деректер базасының артықшылықтары айтылды.
270.00 декларациясын кімдер тапсырады?
Кездесуде жеке тұлғалардың кірістері мен мүлкі туралы 270.00 нысанындағы декларацияны тапсыру мәселесіне ерекше назар аударылды.
Мамандардың айтуынша, декларацияны:
- мемлекеттік қызметшілер;
- заңды тұлғалардың 10%-дан астам үлесі бар құрылтайшылары мен басшылары;
- олардың жұбайлары;
- мамандардың жекелеген санаттары;
- цифрлық активтердің иелері тапсыруға міндетті.
Қатысушыларға декларацияны есепті жылдан кейінгі жылдың 15 қыркүйегіне дейін ұсыну қажеттігі ескертілді.
Декларацияны қалай тапсыруға болады?
Сарапшылар декларацияны бірнеше тәсілмен тапсыруға болатынын түсіндірді:
- Салық төлеушінің кабинеті;
- eGov.kz порталы;
- Kaspi.kz және e-Salyq Azamat мобильді қосымшалары;
- мемлекеттік кірістер органдарына жеке жүгіну арқылы.
Сонымен қатар кірістерді, шетелдік активтерді, мүлікті және қаражат көздерін көрсету тәртібі түсіндіріліп, декларацияны уақытылы тапсырмаған жағдайда қолданылатын жауапкершілік туралы айтылды.
Салық әкімшілендіруіндегі жаңалықтар талқыланды
Кездесу барысында қатысушыларға:
- бақылау-касса машиналарына қатысты өзгерістер;
- жалпыға бірдей декларациялау;
- бөлшек салық;
- аванстық төлемдер;
- жеке тұлғалардың банкроттығы рәсімдері туралы ақпарат берілді.
Цифрлық сервистердің мүмкіндіктері таныстырылды
Мемлекеттік кірістер комитетінің мамандары электрондық сервистердің мүмкіндіктері, 1414 байланыс орталығының жұмысы, шешімдерді шағымдану тәртібі және құқық бұзушылықтардың алдын алу мәселелері жөнінде түсіндіру жұмыстарын жүргізді.
Кездесу барысында тұрғындар белсенді сұрақ қойып, жеке кеңестер алды. Ұйымдастырушылардың айтуынша, мұндай ашық кездесулер алдағы уақытта да офлайн және онлайн форматта тұрақты түрде жалғасады.
