Қазақстан банктерінің активтері 71,35 трлн теңгеге жетті, ал жыл басынан бергі өсім 0,8%-ды (немесе 578,4 млрд теңгені) құрады. Жалпы соманың шамамен 89%-ы Қазақстанның үздік он ЕДБ-сына тиесілі: 63,41 трлн теңге, жыл басынан бері 0,4%-ға (немесе 223,7 млрд теңгеге) өсті.
Активтердің өсімі бойынша Отбасы банк абсолютті көшбасшы атанды: активтері жыл басынан бері 7,4%-ға (немесе 384,1 млрд теңгеге) өсіп, 2026 жылдың 1 мамырына қарай 5,58 трлн теңгеге жетті. Мәлімет үшін: тұрғын үй қарыздары мен тұрғын үй құрылыс жинақтары жүйесіне маманданған бұл мемлекеттік даму институтының несие портфелі 4,23 трлн теңгеге жетіп, 4,4%-ға ұлғайды, ал портфель сапасы мінсіз деңгейде сақталуда (90 күннен астам төленбеген кредиттердің (NPL 90+) жалпы қарыздар көлеміндегі үлесі небәрі 0,1%-ды құрады).
Естеріңізге сала кетейік, «Үлкен үштік» агенттіктері берген Отбасы банкінің рейтингтері Қазақстандағы ЕДБ арасында ең жоғары болып саналады, бұл қаржы институтының жоғары сенімділігі мен қалыптасқан беделдік капиталын дәлелдейді. Мәселен, 2025 жылдың жазында Fitch Ratings агенттігі Отбасы банкінің рейтингісін BBB инвестициялық деңгейінде («Тұрақты» болжамымен) растады. Бұдан бөлек, күзде Sustainable Fitch банктің бағасын 55-тен 60 балға дейін көтеріп, ESG рейтингісін «3» деңгейінде растады. Аналитиктер Отбасы банкінің тұрақты даму көрсеткіштерін жоғары бағалайды. Moody’s агенттігі де 2025 жылдың желтоқсанында қаржы институтының инвестициялық рейтингтерін растады: Baa1 («Тұрақты» болжамымен).
Жылдың басынан бергі активтер өсімі бойынша екінші орынды Freedom Bank иеленді: көрсеткіш 5,1%-ға артып, 2,72 трлн теңгеге жетті. Банктің несие портфелі осы кезеңде 2,1%-ға өсіп, 1,1 трлн теңгені құрады. Қарыздар портфеліндегі NPL 90+ үлесі 2,2%-ға дейін ұлғайды. Банктің рейтингтері сектордағы ең төмен рейтингтердің қатарында: Moody's агенттігінің Ba3 («Тұрақты» болжамы) және S&P Global Ratings агенттігінің B+ («Оң» болжамы) рейтингтері.
Үздік үштікті Kaspi Bank түйіндеді: жылдың басынан бері активтері 4,3%-ға өсіп, 9,89 трлн теңгеге жетті. Банктің несие портфелі жыл басынан бері 0,2%-ға ұлғайып, 8,08 трлн теңгені құрады, ал жалпы қарыздар көлеміндегі NPL 90+ деңгейі 6,3% болды. Банктің рейтингтері инвестициялық санатқа жатады: Moody's агенттігінің Baa3 («Тұрақты» болжамы) және Fitch Ratings берген BBB− («Тұрақты» болжамы) рейтингтері.
Айта кетерлігі, жыл басынан бері үздік ондықтағы банктердің ішінде активтері өскен жалғыз банк — Halyk Bank, 1,4%-ға артты. Қазақстандағы қалған барлық ірі ЕДБ-ларының активтері ағымдағы жылдың 1 мамырына қарай қысқарды.
Жалпы сектор бойынша Қазақстанның 23 банкінің 11-і активтер көлемін ұлғайтса, қалған 12 қаржы институтында керісінше көрсеткіштер төмендеді.
Мәлімет үшін: бір жыл ішінде, яғни, 2025 жылғы сәуірдің соңынан бері ҚР ЕДБ активтерінің көлемі 14%-ға өсті. Соңғы бес жылда бұл көрсеткіш 2,2 есеге, ал он жылда үш есеге артты.
Активтер көлемінің артуы, олардың сапасы сақталған жағдайда, банктердің ресурстық базасының ұлғайып, экономикаға, халық пен бизнеске кредит беру мүмкіндігінің артқанын білдіреді. Бұл инвестициялық белсенділіктің күшеюіне, тұтынушылық сұраныстың артуына және жалпы ел экономикасының дамуына оң ықпал етеді.
