Қазақстандық оқушылар әлемдік ғылым сахнасында ел тарихына алтын әріппен жазылатын жетістікке қол жеткізді.
Колумбияда өткен ең беделді халықаралық физика олимпиадасында ұлттық құраманың бес мүшесі де алтын медаль иеленіп, Қазақстан бұрын-соңды болмаған нәтижеге қол жеткізді, деп хабарлайды DKNews.kz.
2026 жылдың 4–12 шілдесі аралығында Колумбияның Букараманга қаласында өткен 56-шы Халықаралық физика олимпиадасы (International Physics Olympiad, IPhO) қазақстандық жас физиктердің үлкен жеңісімен аяқталды. Әлемнің 85 елінен келген 381 дарынды оқушы бақ сынаған додада Қазақстан құрамасы мінсіз нәтиже көрсетіп, барлық бес қатысушы алтын медаль жеңіп алды.
Бұл – Қазақстанның IPhO тарихындағы ең үздік көрсеткіші.
Олимпиада барысында қатысушылар физиканың күрделі теориялық және эксперименттік тапсырмаларын орындады. Мұндай сынақтар тек терең білімді ғана емес, ғылыми ойлау қабілетін, аналитикалық пайым мен тәжірибелік дағдыларды талап етеді. Қазақстандық оқушылар осы талаптардың барлығын жоғары деңгейде орындап, әлемнің ең мықты жас физиктері қатарынан көрінді.
Посмотреть эту публикацию в Instagram
Алтын медаль иегерлері
Қазақстанға тарихи жеңіс сыйлаған оқушылар:
- Егенбергенова Нұргүл – Астана қаласындағы NURORDA мектеп-лицейінің 11-сынып оқушысы;
- Азатбеков Амирбек – Астана қаласындағы жаратылыстану-математика бағытындағы NIS-тің 12-сынып оқушысы;
- Қазымбек Илияс – Астана қаласындағы Spectrum International School мектебінің 12-сынып оқушысы;
- Черемнов Роман – Алматы қаласындағы «Мирас» халықаралық мектебінің 12-сынып оқушысы;
- Құрман Дамир – Астана қаласындағы жаратылыстану-математика бағытындағы NIS-тің 11-сынып оқушысы.
Үш жылдық дайындықтың жемісі
Бұл тарихи нәтиже кездейсоқ келген жоқ. Ұлттық құрама үш жыл бойы жүйелі түрде дайындалып, халықаралық деңгейдегі оқу-жаттығу жиындарынан өтті. Команданы мектеп мұғалімдері, тәлімгерлер және олимпиадалық даярлық бойынша тәжірибелі жаттықтырушылар дайындады.
Дайындық жұмыстарына әл-Фараби атындағы Қазақ ұлттық университетінің аға оқытушысы, PhD докторы Гүлия Нұрбақова жетекшілік етті. Ал олимпиада кезінде ұлттық құраманың жұмысын SDU университетінің аға оқытушысы, PhD докторы Самат Мақсұтов пен физикадан халықаралық олимпиадалардың жүлдегері Алишер Еркебаев үйлестірді.
Қазақстан үшін тарихи белес
Халықаралық физика олимпиадасы 1967 жылдан бері өткізіліп келеді және әлемдегі ең беделді пәндік жарыстардың бірі саналады. Қазақстан бұл білім додасына 1997 жылдан бері тұрақты қатысып келеді.
Өткен жылы ұлттық құрама екі күміс және үш қола медальмен шектелген болатын. Ал биыл бес қатысушының бәрі алтын медаль жеңіп алып, Қазақстанның олимпиадалық тарихындағы ең жарқын жетістікті тіркеді.
Бұл жеңіс тек бес дарынды оқушының ғана емес, еліміздегі олимпиадалық білім беру жүйесінің, ұстаздардың кәсіби еңбегінің және ғылымға қызығушылық танытып жүрген жас буынның әлеуетінің айқын дәлелі болды.
Қазақстандық жас физиктердің бұл жетістігі әлемдік білім кеңістігінде еліміздің беделін арттырып қана қоймай, ғылым жолын таңдаған мыңдаған оқушы үшін жаңа мотивацияға айналары сөзсіз.
