Қазақстанда қоғамға пайда әкелетін бизнестің қатары артып келеді.
2026 жылдың екінші тоқсанының қорытындысы бойынша еліміздегі Әлеуметтік кәсіпкерлік субъектілерінің бірыңғай тізіліміне 1776 кәсіпкер енгізілді. Бұл – бірінші тоқсанмен салыстырғанда 11,2%, деп хабарлайды DKNews.kz.
Мұндай өсім әлеуметтік кәсіпкерлікке қызығушылықтың күшейгенін ғана емес, бизнестің табыс табумен қатар қоғамдық мәселелерді шешуге де көбірек бет бұра бастағанын көрсетеді.
ҚР Ұлттық экономика министрлігінің мәліметінше, Әлеуметтік кәсіпкерлік субъектілерінің бірыңғай тізілімі тоқсан сайын жаңартылып отырады. Тізілімге енген кәсіпкерлер заңнамада қарастырылған мемлекеттік қолдау шараларына қол жеткізіп, әлеуметтік маңызы бар жобаларын дамыту мүмкіндігіне ие болады.
Әлеуметтік кәсіпкерлік нені білдіреді?
Әлеуметтік кәсіпкерлік – бұл тек коммерциялық қызмет емес. Мұндай бизнес қоғам үшін маңызды міндеттерді шешуге бағытталады. Олардың қатарында:
- мүгедектігі бар адамдарды жұмыспен қамту;
- халықтың әлеуметтік осал топтарына жұмыс беру;
- әлеуметтік маңызы бар қызметтер көрсету;
- қоғамдағы өзекті мәселелерді шешуге арналған жобаларды жүзеге асыру.
Соңғы жылдары дәл осындай кәсіп түрі әлемде де, Қазақстанда да ерекше назарға ілігіп келеді. Себебі ол экономикалық тиімділік пен әлеуметтік жауапкершілікті қатар ұштастырады.
Тізілімге қалай енгізіледі?
Әлеуметтік кәсіпкер мәртебесі автоматты түрде берілмейді. Ол үшін кәсіпкер өтініш береді. Кейін құжаттарды жергілікті атқарушы органдар жанындағы арнайы комиссия қарап, заңда белгіленген талаптарға сәйкестігін бағалайды.
Комиссияның оң шешімі шыққан жағдайда ғана кәсіпкер Әлеуметтік кәсіпкерлік субъектілерінің бірыңғай тізіліміне енгізіледі.
Сарапшылардың пікірінше, әлеуметтік кәсіпкерліктің кеңеюі жаңа жұмыс орындарының ашылуына, әлеуметтік жобалардың көбеюіне және мемлекет пен бизнестің қоғам алдындағы ортақ жауапкершілігін күшейтуге ықпал етеді. Ал тізілімдегі кәсіпкерлер санының тоқсан сайын артып келе жатқаны бұл бағыттың Қазақстанда тұрақты дамып келе жатқанын аңғартады.
