Қазақстан Ұлттық Банкі Ұлттық цифрлық қаржы инфрақұрылымы (ҰЦҚИ) жобаларының жүзеге асырылу барысын таныстырды. Презентация барысында Банкаралық мобильді төлемдер жүйесінің (БМТЖ) іске қосылатыны және оның негізгі сервистері – телефон нөмірі арқылы банкаралық аударымдар мен QR-код арқылы банкаралық төлемдер қолжетімді болатыны жарияланды, деп хабарлайды DKNews.kz.
Заңнамаға сәйкес жаңа жүйе ел көлемінде 2026 жылғы 19 шілдеден бастап ресми түрде іске қосылады.
Қазақстандықтар үшін не өзгереді?
БМТЖ іске қосылғаннан кейін жүйеге қатысушы банктердің клиенттері:
- телефон нөмірі арқылы басқа банктің клиентіне лезде ақша аудара алады;
- қай банктің картасын пайдаланатынына қарамастан QR-код арқылы тауарлар мен қызметтердің ақысын төлей алады;
- барлық операцияны тәулік бойы нақты уақыт режимінде жүргізе алады.
Қазіргі уақытта жүйеге мобильді қосымшалар арқылы халыққа қызмет көрсететін барлық банк қосылған.
Кәсіпкерлерге қандай мүмкіндік беріледі?
Жаңа жүйе бизнес үшін де төлем қабылдау процесін жеңілдетеді.
Атап айтқанда:
- барлық қатысушы банктердің клиенттерінен бір ғана QR-код арқылы төлем қабылдауға болады;
- жаңа терминал немесе қосымша жабдық орнатудың қажеті жоқ;
- қызмет қолданыстағы терминалдар арқылы көрсетіледі.
Ал мобильді қосымшаны жаңарту мәселелері бойынша клиенттер өз банктеріне жүгіне алады.
Ұлттық цифрлық қаржы инфрақұрылымына не кіреді?
Ұлттық Банк мәліметінше, Ұлттық цифрлық қаржы инфрақұрылымы бірнеше маңызды платформадан тұрады.
Олардың қатарында:
- Ұлттық төлем жүйесі;
- биометриялық сәйкестендіру платформасы;
- цифрлық теңге платформасы;
- ашық банкинг платформасы;
- Ұлттық антифрод-орталық.
Жүйенің қазіргі көрсеткіштері қандай?
Ұлттық Банк қазіргі уақытта ҰЦҚИ аясында қол жеткізілген нәтижелерді де жариялады.
Негізгі көрсеткіштер:
- Ұлттық төлем жүйесінде күніне шамамен 6,3 триллион теңге өңделеді;
- айналымға 340 миллиард теңгеден астам цифрлық теңге шығарылды;
- биометриялық сәйкестендіру сервисі ай сайын 3,5 миллионға жуық сұранысты өңдейді;
- Ұлттық антифрод-орталық жұмысын бастағалы 165 мыңнан астам алаяқтық және өзге де заңсыз операцияны анықтады.
Олардың қатарында қаржы пирамидалары мен заңсыз ойын бизнесіне қатысты құқық бұзушылықтар да бар.
Неліктен бұл маңызды?
Ұлттық цифрлық қаржы инфрақұрылымы қаржы қызметтерін халық пен бизнес үшін қолжетімді әрі қауіпсіз етуге бағытталған. Сонымен қатар жаңа жүйе банктер арасындағы бәсекені күшейтіп, төлем қызметтерін жеделдетуге және Қазақстанның төлем инфрақұрылымының технологиялық тәуелсіздігін нығайтуға мүмкіндік береді.
