FlyArystan әуекомпаниясы Visit Almaty орталығымен бірлесіп, Қазақстан Республикасының Сиань қаласындағы Бас консулдығының қолдауымен Қытайдың Сиань қаласында роуд-шоу өткізді. Іс-шара Алматы – Сиань тікелей әуе бағытын ілгерілетуге, сондай-ақ Қазақстан мен Қытай арасындағы туристік және іскерлік байланыстарды нығайтуға арналды, деп хабарлайды DKNews.kz.
Роуд-шоуға Қытайдың туристік индустриясы өкілдері, салалық ұйымдар мен бұқаралық ақпарат құралдары қатысты. Қазақстан делегациясының құрамында FlyArystan, Алматы қаласының Туризм басқармасы және шетелдік туристерді қабылдайтын жетекші отандық туроператорлар болды.
Жаңа бағыт екі ел арасындағы байланысты күшейтеді
Іс-шараны Қазақстан Республикасының Сиань қаласындағы консулы Берік Ибрагимов ашып, жаңа әуе бағытының стратегиялық маңызын атап өтті.
«FlyArystan рейсі – бұл жай ғана жаңа бағыт емес, ол бизнес, туризм, білім беру және инвестиция салаларындағы ынтымақтастықты нығайтатын қос ел арасындағы маңызды көпір. Бұл бағыт визасыз режимді бұрынғыдан да қолжетімді етіп, стратегиялық серіктестікті нақты іске айналдырады. Қазақстан мен Қытай өзара ынтымақтастықты одан әрі тереңдетуге ниетті, ал бүгінгі роуд-шоу соның айқын дәлелі. Сіздерді FlyArystan және Visit Almaty-мен бірге күннің, таулардың және қонақжайлықтың қаласы – Алматыны танып-білуге шақырамыз.»
Қытайлық серіктестерге Алматының туристік әлеуеті таныстырылды
Роуд-шоу барысында қатысушыларға жаңа бағыттың мүмкіндіктері мен Алматы қаласының туристік әлеуеті кеңінен таныстырылды.
Бағдарлама аясында:
- FlyArystan рейстер кестесі мен тікелей әуе қатынасының артықшылықтарын ұсынды;
- Visit Almaty Алматының туристік мүмкіндіктерін таныстырды;
- қазақстандық туроператорлар қытайлық серіктестерге жаңа туристік өнімдерін ұсынды.
FlyArystan: бұл – ұзақ мерзімді серіктестікке бастайтын қадам
FlyArystan компаниясының маркетинг және коммуникациялар жөніндегі директоры Жанар Жайлауова мұндай кездесулердің маңызын атап өтті.
«FlyArystan үшін халықаралық маршруттық желіні дамыту – жаңа рейстерді іске қосудан ғана тұрмайды, бұл ұзақ мерзімді серіктестікті қалыптастырумен қатар жүреді. Сианьдағы роуд-шоу қытайлық туроператорлар мен агенттіктермен тікелей диалог орнатуға мүмкіндік берген маңызды алаңға айналды. Біз Алматы – Сиань жаңа бағытының әлеуеті мен туристер ағынын арттыруға бағытталған бірлескен бастамаларды жан-жақты талқылауға мүмкіндік алдық. Мұндай кездесулер Қазақстанға келетін туристер ағынының артуына қосымша серпін беретініне сенімдіміз.»
B2B кездесулер өтті
Іскерлік бағдарлама B2B форматындағы кездесулермен аяқталды.
Тараптар:
- жаңа туристік пакеттерді әзірлеу;
- бірлескен маркетингтік жобаларды іске асыру;
- Қазақстан мен Қытайдың туристік компаниялары арасындағы ынтымақтастықты кеңейту бағыттарын талқылады.
Рейстер аптасына екі рет орындалады
FlyArystan әуекомпаниясының Алматы – Сиань бағыты бойынша тұрақты рейстері:
- Алматыдан – сейсенбі және жұма күндері;
- Сианьнан – сәрсенбі және сенбі күндері орындалады.
Неліктен бұл маңызды?
Алматы – Сиань тікелей рейсі Қазақстан мен Қытай арасындағы туристік және іскерлік байланыстарды дамытуға жаңа мүмкіндік береді. Бағыт екі ел арасындағы сапарларды жеңілдетіп, визасыз режимнің мүмкіндіктерін кеңінен пайдалануға, сондай-ақ туристер ағыны мен инвестициялық ынтымақтастықты арттыруға ықпал етеді.
