Қазақстанда кадр тапшылығы бар өңірлерге ерікті қоныс аудару бағдарламасы жаңартылып жатыр. Енді қатысушылар жаңа өңірде баспана сатып алу үшін 7 миллион теңгеге дейін экономикалық ұтқырлық сертификатын ала алады, деп хабарлайды DKNews.kz.
Бағдарламадағы өзгерістердің басты мақсаты – азаматтардың тек өңір ауыстыруына емес, жаңа жерде тұрақты қоныстанып, жайлы өмір сүруіне жағдай жасау.
Тұрғын үй сатып алуға берілетін қолдау ұлғайды
Жаңартылған бағдарламаға сәйкес экономикалық ұтқырлық сертификатының ең жоғары мөлшері 7 млн теңгеге дейін (1 625 АЕК) көбейтілді.
Бұл қаражатты қатысушылар жаңа өңірде жеке тұрғын үй сатып алуға пайдалана алады.
Қоныс аударушыларға қандай қолдау көрсетіледі?
Мемлекеттік қолдау тұрғын үй сертификатымен ғана шектелмейді.
Бағдарлама аясында:
- көшуге арналған субсидиялар төленеді;
- тұрғын үйді жалдау шығындары өтеледі;
- коммуналдық қызметтердің ақысы өтеледі;
- жұмысқа орналасуға жан-жақты қолдау көрсетіледі.
Сонымен қатар азаматтар жаңа өңірге көшпей тұрып-ақ жұмыс берушіні таңдап, бос жұмыс орындарымен таныса алады. Ол үшін қабылдаушы өңірлерде тұрақты түрде бос жұмыс орындары жәрмеңкелері ұйымдастырылады.
Бағдарламаға қатысушылар саны кеңейді
Жаңартылған бағдарлама енді азаматтардың кеңірек тобына қолжетімді болады.
Мемлекеттік қолдау шараларын:
- еңбек нарығында сұранысқа ие мамандар;
- шаруа қожалықтарының басшылары;
- фермер қожалықтарының басшылары пайдалана алады.
Бұған дейін бағдарлама негізінен жұмыссыз азаматтарға бағытталған болатын.
Барлық қызмет онлайн форматқа көшірілді
Бағдарлама толық цифрлық форматта жұмыс істейді.
Енді migration.enbek.kz порталы арқылы:
- өтінім беруге;
- өңірлер картасымен танысуға;
- сұранысқа ие мамандықтар тізімін көруге;
- бос жұмыс орындарын таңдауға болады.
Бұл азаматтарға барлық рәсімді қашықтан орындауға мүмкіндік береді.
Бағдарламаға 73,9 мың адам қатысты
2017 жылдан бері ерікті қоныс аудару бағдарламасына 73,9 мың адам қатысқан.
Жұмыспен қамту шараларының нәтижесінде олардың 31 мыңға жуығы тұрақты жұмысқа орналасқан.
Неліктен бұл маңызды?
Кадр тапшылығы бар өңірлерге еңбек ресурстарын тарту өңірлер арасындағы теңгерімді дамытуға ықпал етеді. Қаржылық қолдау көлемінің артуы азаматтарға жаңа жерде баспаналы болып, тұрақты жұмысқа орналасуға мүмкіндік береді. Ал бағдарламаның цифрландырылуы мемлекеттік қызметтердің қолжетімділігін арттырып, қоныс аудару рәсімін жеңілдетеді.
