Өскеменде тоғыз күнге созылған ірі шахмат додасы мәресіне жетті.
Өскемен қаласында өткен «Oskemen Open 2026» халықаралық шахмат фестиваліне 16 елден келген 199 спортшы қатысып, тоғыз күн ішінде 900-ге жуық партия ойналды. Жарыс ерлер мен әйелдер арасындағы классикалық шахматтан Қазақстан Кубогінің екінші кезеңі ретінде ұйымдастырылды, деп хабарлайды DKNews.kz.
Masters турнирінде Андрей Есипенко топ жарды
Фестивальдің басты жарысы – Masters турнирінде 24 жастағы Андрей Есипенко (FIDE) жеңімпаз атанып, 9 миллион теңге көлеміндегі бас жүлдені иеленді.
Жүлделі орындар былайша бөлінді:
- 1-орын – Андрей Есипенко (FIDE);
- 2-орын – Полина Шувалова (FIDE);
- 3-орын – Давид Паравян (FIDE).
Қазақстандық шахматшылар арасында ең жоғары нәтижені 17 жастағы Даниял Сапенов көрсетіп, жалпы есепте 12-орынға тұрақтады.
Жеңімпаз Андрей Есипенко турнирдің жоғары деңгейде өткенін атап өтті.
«Турнир өте тартысты өтті. Бұл – биыл Қазақстанда классикалық шахматтан қатысқан екінші турнирім. Алғашқысы шамамен бір жарым ай бұрын Ақтөбеде өткен едім. Онда нәтижем төмендеу болып, жетінші орын алған едім. Ал бұл турнир, жалпы алғанда, өте сәтті өтті. Төрт кездесуде тең түсіп, бес партияда жеңіске жеттім. Әрине, турнирде топ жарған кезде ерекше әсерде боласың. Әсіресе, көшбасшы болып келе жатып, жеңісті қолдан бермеу маңызды болған соңғы партиялар өте толқынысты өтті», – деді Андрей Есипенко.
Қазақстандық шахматшылар арнайы марапаттарға ие болды
Алғашқы 15 орыннан бөлек, бірнеше арнайы номинация бойынша үздіктер анықталды.
Атап айтқанда:
- Қазыбек Нөгербек, Алдияр Ансат және Әлішер Сүлейменов – Қазақстанның үздік үш шахматшысы;
- Максим Матлаков пен Денис Махнёв – Эло 2500–2599 рейтингіндегі үздіктер;
- Александр Усов пен Роман Кезин – Эло 2400–2499 рейтингіндегі үздіктер;
- Артём Бардык пен Назар Талғатов – Эло 2300–2399 рейтингіндегі үздіктер;
- Лия Құрманғалиева, Әсел Серікбай және Шубхи Гупта – әйелдер арасындағы үздік үш ойыншы.
Open турнирінде шымкенттік шахматшы жеңіске жетті
Open турнирінде Шымкент қаласының өкілі Әбілмансұр Әбділхаиыр бірінші орынға ие болды.
Жүлделі орындар:
- 1-орын – Әбілмансұр Әбділхаиыр (Шымкент);
- 2-орын – Арыстан Исанжулов (Семей);
- 3-орын – Владислав Малыгин (Павлодар).
Жеңімпаз шешуші кездесудің өте тартысты өткенін айтты.
«Турнир тартысты өтті. Ең шешуші сәт сегізінші кезеңде болған сияқты. Партияның басында, шыны керек, басымдықты қарсыласыма беріп қойған едім, бірақ ол бұны байқамады. Сондықтан жеңілдеп қалып, ойынды әрі қарай жалғастырып, жеңісті жұлып алдым. Қарсыластарым өте мықты болды: халықаралық шеберлер мен ФИДЕ шеберлері бақ сынасты», – деді Әбілмансұр Әбділхаиыр.
Турнирге 16 елдің үздік шахматшылары қатысты
Masters турнирінде 16 мемлекеттен келген 77 шахматшы бақ сынады.
Олардың қатарында:
- 22 халықаралық гроссмейстер (GM);
- 1 әйелдер арасындағы халықаралық гроссмейстер (WGM);
- 29 халықаралық шебер (IM) болды.
Open турниріне тағы 122 шахматшы қатысты.
Жарыстың жалпы жүлде қоры 50 миллион теңгені (100 мың АҚШ доллары) құрады.
- Masters турнирі – 45 млн теңге;
- Open турнирі – 5 млн теңге.
Екі турнир де швейцариялық жүйе бойынша тоғыз турда классикалық уақыт бақылауымен өткізілді.
Қазақстан Кубогінің келесі кезеңі Атырауда өтеді
«Oskemen Open 2026» – классикалық шахматтан Қазақстан Кубогінің екінші кезеңі.
Алғашқы 20 орын алған қатысушылар Кубоктың жалпы есебіне ұпай жинады.
- Үшінші кезең – 12–20 қазан аралығында Атырауда;
- Финал – желтоқсан айында Астанада өтеді.
Шығыс Қазақстан облыстық Қазақстан шахмат федерациясының атқарушы директоры Алекс Кудинов бұл турнирдің өңір үшін ерекше маңызға ие екенін айтты.
«Бұл – біздің үшінші Кубогіміз. Өздеріңіз білетіндей, Oskemen Open біз үшін дәстүрлі турнирге айналды. Өңіріміз пен облысымыз үшін бұл өте маңызды жоба, өйткені балаларымыздың халықаралық гроссмейстерлердің ойынын көріп, олармен бірге тақтада бақ сынасуына мүмкіндігі бар. Бұл Кубок одан әрі дамып, жыл сайын қатысушылар саны арта түседі деп үміттенеміз», – деді Алекс Кудинов.
Неліктен бұл маңызды?
«Oskemen Open» соңғы жылдары Қазақстандағы ең беделді халықаралық шахмат турнирлерінің біріне айналды. Мұндай жарыстар отандық шахматшылардың тәжірибе жинауына, жас спортшылардың әлемдік деңгейдегі қарсыластармен күш сынасуына және елімізде зияткерлік спорттың дамуына серпін береді.
