Теміржолдағы төрт адамның қазасы: сот үкім шығарды

Шу аудандық соты төрт теміржолшының өмірін қиған қайғылы оқиға бойынша үкім шығарды.

Пойыз диспетчері түрмеге қамалып, екі қызметкерге бас бостандығын шектеу жазасы тағайындалды, деп хабарлайды DKNews.kz.

2025 жылдың желтоқсанында Жамбыл облысының Шу ауданында болған теміржолдағы қайғылы оқиғаға қатысты сот үкімі жарияланды. Жүк пойызы жөндеу жұмыстарын жүргізіп жатқан бригаданы басып кетіп, салдарынан төрт адам қаза тауып, тағы екі қызметкер ауыр жарақат алған еді.

Енді осы іс бойынша теміржол саласының үш қызметкері жауапқа тартылды.

Қайғылы оқиға қалай болды?

Іс материалдарына сәйкес, апат 2025 жылғы 10 желтоқсанда «Шешенқара – Қаражыңғыл» теміржол аралығында болған.

Сол күні теміржолшылар жолды жөндеу жұмыстарын жүргізген. Алайда жұмыстар қозғалыс учаскесін толық жаппай және қауіпсіздік талаптарын сақтамай ұйымдастырылған.

Соның салдарынан жүк пойызы жөндеу жүргізіп жатқан бригаданы басып өткен.

Тергеу барысында пойыз машинисіне жол бойында адамдардың жұмыс істеп жүргені туралы дер кезінде хабар берілмегені анықталды.

Төрт адам қаза тапты

Қайғылы оқиға салдарынан төрт теміржол қызметкері оқиға орнында көз жұмды. Тағы екі адам түрлі дене жарақаттарын алды.

Бұл оқиға еліміздегі теміржол қауіпсіздігіне қатысты ең ауыр өндірістік апаттардың бірі ретінде қоғамның назарын аударған болатын.

Сот қандай үкім шығарды?

Шу аудандық сотының 2026 жылғы 9 шілдедегі үкімімен:

• пойыз диспетчері 5 жылға бас бостандығынан айырылды;
• Сарышаған жол дистанциясының екі қызметкері 3 жыл 6 айға бас бостандығын шектеу жазасына кесілді.

Сонымен қатар, сотталған үш азаматтың барлығына да теміржол көлігіндегі қозғалыс қауіпсіздігін қамтамасыз етуге байланысты қызметпен айналысуға тыйым салынды.

Прокуратураның мәліметі

Іс бойынша мемлекеттік айыптауды транспорттық прокуратура қолдады.

Бас көлік прокуратурасының мәліметінше, сот үкімі әзірге заңды күшіне енген жоқ. Сондықтан тараптардың оны жоғары тұрған сотқа шағымдануға мүмкіндігі бар.