Тамыз аптаппен басталады. Қазақстанның оңтүстігінде ауа температурасы +44 градусқа дейін көтерілсе, солтүстік өңірлерде нөсер, бұршақ және секундына 28 метрге жететін дауыл соғады, деп хабарлайды DKNews.kz.
Ең қатты ыстық 1 тамызда Түркістан облысында болады. Күндіз термометр бағаны +39…+44 градусты көрсетеді, ал өңірдің батысы мен солтүстігінде шаңды дауыл көтеріледі.
Түркістан қаласында ауа +41…+43, Шымкентте +39…+41 градусқа дейін қызады. Тіпті түнде температура +22…+27 градустан төмендемейді.
Қызылорда облысында күндіз +43 градус болады. Қызылорда қаласында жауын-шашынсыз, ашық ауа райы сақталып, аптап +40…+42 градусқа жетеді.
Қарағанды облысының оңтүстігінде, сондай-ақ Ұлытау және Абай облыстарының жекелеген аудандарында +41 градус ыстық күтіледі. Жезқазғанда +36…+38, Семейде +33…+35 градус болады.
Алматы аптап құрсауында қалады
Алматыда жауын-шашын болмайды. Күндіз ауа температурасы +35…+37 градусқа дейін көтеріледі.
Қонаевта бұдан да ыстық — +37…+39 градус. Алматы облысы мен Жетісу өңірінің кей жерлерінде де термометр бағаны +39 градусқа жетеді.
Алакөл маңында аптапқа қатты жел қосылады. Желдің екпіні кей уақытта секундына 25 метрге дейін күшейеді.
Астанада түстен кейін ауа райы бұзылады
Елордада күндіз +35…+37 градус ыстық болады. Түстен кейін қысқа мерзімді жаңбыр жауып, найзағай ойнап, бұршақ түсуі мүмкін.
«Астана қаласында күн құбылмалы бұлтты, күннің екінші жартысында қысқа мерзімді жаңбыр, найзағай, бұршақ күтіледі. Оңтүстік-шығыстан секундына 9–14 метр жел соғады, күндіз екпіні 15–20 метрге жетеді. Ауа температурасы түнде +22…+24, күндіз +35…+37 градус болады».
Павлодарда да осындай ауа райы қалыптасады. Алдымен температура +34…+36 градусқа дейін көтеріліп, кейін жаңбыр, найзағай, бұршақ пен дауыл соғуы ықтимал.
Қарағандыда күндіз +34…+36 градус болады. Қалада аздаған жаңбыр жауып, найзағай ойнауы мүмкін, бірақ аптап басылмайды.
Солтүстікте жағдай күрделене түседі
Қостанай және Солтүстік Қазақстан облыстары ауа райының негізгі соққысын қабылдайды. Бұл өңірлерде қатты жаңбыр, найзағай, бұршақ және дауыл күтіледі.
Желдің екпіні кей уақытта секундына 23–28 метрге жетеді. Мұндай жел ағаш бұтақтарын сындырып, әлсіз бекітілген құрылымдарды жұлып, тасжолдардағы қозғалысты қиындатуы мүмкін.
«Жаңбыр жауып, найзағай ойнайды, облыстың батысында, солтүстігі мен оңтүстігінде қатты жаңбыр күтіледі. Күндіз бұршақ жауып, дауыл соғады. Желдің екпіні кей уақытта секундына 23–28 метрге жетеді».
Қостанайда жаңбыр, найзағай және бұршақ кезінде ауа температурасы +25…+27 градус шамасында болады. Петропавлда нөсер жауып, күндіз +29…+31 градус көрсетеді.
Ақтөбе облысына да дауылды аймақ әсер етеді. Өңірдің орталығында жел секундына 28 метрге дейін күшейіп, жаңбыр, найзағай, бұршақ және дауыл болуы ықтимал.
Батыс өңірлерде салыстырмалы түрде салқын болады. Оралда ауа +25…+27, Ақтауда +30…+32, Атырауда +32…+34 градусқа дейін жылынады.
