Қазақстанда тұрғын үй құрылысы саласын цифрландыру тағы бір маңызды кезеңге өтті.
Енді құрылыс компаниялары үлескерлердің қаражатын тартуға рұқсат алу үшін мемлекеттік органдарға қағаз құжат тасымайды, деп хабарлайды DKNews.kz.
Барлық рәсім «Қазтізілім» бірыңғай цифрлық жүйесі арқылы онлайн жүзеге асады.
Жаңа функция тұрғын үй құрылысына үлестік қатысудың бірыңғай цифрлық жүйесі – «Қазтізілімде» іске қосылды.
Енді өтінім толықтай онлайн беріледі
Жаңа сервис арқылы тұрғын үй құрылысына үлескерлердің қаражатын тартуды жоспарлаған уәкілетті компаниялар мемлекеттік қызметті электрондық форматта ала алады.
Процесс барынша жеңілдетілген:
- өтінім тікелей «Қазтізілім» жүйесінде рәсімделеді;
- құжаттарды жергілікті атқарушы органдар онлайн қарайды;
- барлық кезең бір цифрлық платформада өтеді.
Бұл компанияларға уақыт үнемдеуге мүмкіндік берсе, мемлекеттік қызметтің ашықтығы мен тиімділігін де арттырады.
Рұқсат 8 жұмыс күнінде беріледі
Жаңа тәртіпке сәйкес, мемлекеттік қызмет көрсету мерзімі – өтінім жүйеге түскен сәттен бастап 8 жұмыс күні.
Өтінім мақұлданған жағдайда компания үлескерлердің қаражатын тартуға арналған электрондық рұқсатты алады.
Бұл қағаз құжат айналымын қысқартып қана қоймай, шешім қабылдау процесін де едәуір жеделдетуге мүмкіндік береді.
Министрлік: бұл қызметті алуды әлдеқайда жеңілдетеді
ҚР Өнеркәсіп және құрылыс министрлігі Құрылыс және тұрғын үй-коммуналдық шаруашылық істері комитетінің Тұрғын үй құрылысына үлестік қатысу басқармасының басшысы Біржан Елеусіздің айтуынша, жаңа функция мемлекеттік қызмет көрсету сапасын жаңа деңгейге шығарады.
«Бұл жаңа мүмкіндік рұқсат алу үдерісін мейілінше ыңғайлы әрі тиімді етеді. Өтінімдерді беру және қарау бірыңғай цифрлық жүйе арқылы жүзеге асырылады. Бұл уәкілетті компаниялар мен мемлекеттік органдар арасындағы өзара іс-қимылды жеңілдетеді, қағаз құжат айналымын қысқартады, құжаттарды өңдеу уақытын жеделдетеді және мемлекеттік қызмет көрсетудің бірыңғай әрі ашық тәртібін қамтамасыз етеді», – дейді ҚР Өнеркәсіп және құрылыс министрлігі Құрылыс және тұрғын үй-коммуналдық шаруашылық істері комитеті Тұрғын үй құрылысына үлестік қатысу басқармасының басшысы Біржан Елеусіз.
Құрылыс саласын цифрландыру жалғасады
Жаңа функцияның іске қосылуы – құрылыс саласын толық цифрландыруға бағытталған кезекті маңызды қадам.
Өнеркәсіп және құрылыс министрлігі Қазақстандық тұрғын үй компаниясымен бірлесіп, «Қазтізілім» жүйесінің мүмкіндіктерін одан әрі кеңейтіп, үлестік құрылыс нарығының цифрлық экожүйесін дамыту жұмыстарын жалғастырып жатыр.
Сарапшылардың пікірінше, мұндай шешімдер құрылыс компаниялары үшін әкімшілік рәсімдерді жеңілдетіп қана қоймай, мемлекеттік қызметтердің ашықтығын арттыруға және тұрғын үй құрылысы саласындағы цифрлық трансформацияны жеделдетуге ықпал етеді.
