2026 жылдың шілде айында Қазақстанның Мемлекеттік шекарасында мыңдаған құқық бұзушылықтың жолы кесілді.
ҰҚК Шекара қызметінің мәліметінше, бір ай ішінде есірткі, қару-жарақ, заңсыз валюта және миллиардтаған теңгенің тауары тәркіленіп, Каспийде браконьерлерге де соққы берілді, деп хабарлайды DKNews.kz.
Шекара – ел қауіпсіздігінің алғашқы шебі. Күн сайын мұнда тек адамдар ғана емес, заңсыз жүк, қару-жарақ, есірткі мен ірі көлемдегі қаржының қозғалысы да бақылауда болады. Шілде айының қорытындысы бұл бағыттағы жұмыстың қаншалықты ауқымды екенін тағы бір мәрте көрсетті.
ҰҚК Шекара қызметі құзырлы мемлекеттік органдармен бірлесіп жүргізген іс-шаралар барысында 4 975 адамды ұстаған. Олардың 4 346-сы – шетел азаматтары.
Миллиардтаған теңгенің заңсыз жүгі тоқтатылды
Бір ай ішінде шекара арқылы заңсыз өткізілмек болған 2 476 жүктің жолы кесілді. Заңсыз айналымнан алынған тауарлар мен қаржының жалпы құны 3,9 миллиард теңгеден асты.
Ең көп анықталған құқық бұзушылықтардың қатарында:
- 39 факт – есірткі заттарын заңсыз алып өту әрекеті;
- 88 факт – қару-жарақ пен оқ-дәрі тасымалдау;
- 1 808 факт – 150 тоннадан асатын жанар-жағармай материалдарын заңсыз шығару әрекеті. Оның жалпы құны 33,4 миллион теңге;
- 392 факт – құны 1,3 миллиард теңгеден асатын халық тұтынатын тауарлар;
- 149 факт – шамамен 2,1 миллиард теңге көлеміндегі шетел валютасын заңсыз алып өту әрекеті.
Сонымен қатар тәркіленген қарулардың ішінде 108 дана суық қару мен 2 131 дана оқ-дәрі болған.
Каспийдегі браконьерлерге тосқауыл
Шекарашылардың жұмысы тек құрлықтағы бақылаумен шектелмейді.
Шілде айында Каспий теңізінің акваториясында браконьерлікпен айналысудың 34 фактісі тоқтатылды.
Рейдтер барысында:
- 24,6 шақырым браконьерлік ау тәркіленді;
- 103 дана бекіре тұқымдас балық (жалпы салмағы 580 келі) заңсыз айналымнан алынды.
Мамандардың бағалауынша, табиғатқа келуі мүмкін шығынның алдын алу көлемі 251 миллион теңгеден асты.
Ондаған қылмыстық іс қозғалды
Шекара қызметінің мәліметіне сәйкес, анықталған заң бұзушылықтар бойынша 63 қылмыстық іс қозғалып, қазіргі уақытта тергеу амалдары жүргізіліп жатыр.
Сонымен бірге 4 295 әкімшілік іс бойынша өндіріс ашылып, құқық бұзушыларға 38 миллион теңгеден астам айыппұл салынған.
Қалған материалдар заң талаптарына сәйкес процессуалдық шешім қабылдау үшін құқық қорғау және сот органдарына жолданған.
