Енді артық тәуекел үшін төлемеуге болады.
Freedom Insurance Қазақстанда КАСКО PRO ерікті автосақтандыру өнімін іске қосты. Жүргізуші сақтандырылатын тәуекелдерді, франшиза мөлшерін, өтемақыны есептеу тәсілін және полистің қолданылу аумағын өзі таңдай алады, деп хабарлайды DKNews.kz.
Жаңа өнім конструктор қағидатымен жұмыс істейді. Автокөлік иесі қажетсіз опцияларды алып тастап, полис құнын төмендете алады немесе қосымша қызметтерді таңдап, сақтандыру қорғанысын күшейте алады.
Бағдарлама жеңіл автокөліктермен шектелмейді. КАСКО PRO арқылы өзге де көлік түрлерін сақтандыруға болады.
КАСКО міндетті автосақтандырудан несімен ерекшеленеді
Міндетті автосақтандыру жүргізушінің басқа жол қозғалысына қатысушылар алдындағы жауапкершілігін өтейді. Ал КАСКО клиенттің өз көлігін жол апатынан, ұрлықтан және тұрақта тұрған кездегі зақымнан қорғайды.
КАСКО бойынша төлем тек жол-көлік оқиғасына кімнің кінәлі екеніне байланысты емес. Мұнда келісімшарт талаптары, таңдалған тәуекелдер мен сақтандырудан тыс жағдайлар шешуші рөл атқарады.
Төрт қорғаныс пакеті
КАСКО PRO сақтандыру қорғанысының төрт нұсқасын ұсынады.
Ең толық пакет жол-көлік оқиғасын, тұрақта тұрған кездегі зақымдануды және автокөліктің ұрлануын қамтиды. Қалған нұсқаларда тек ЖКО тәуекелін қалдыруға немесе оған тұрақтағы зақым мен ұрлықтан қорғауды қосуға болады.
Таңдалған пакетке қарай вандализм, өрт, жарылыс, бұршақ, нөсер жауын мен қатты жел де сақтандыру жағдайына жатады. Тізімге мұздың немесе қардың құлауы, автокөлікті эвакуациялау, сүйреп әкету және инженерлік желілерден аққан су мен будан келген зақым да кіреді.
Тәуекелдер тізімі қысқарған сайын полис бағасы да төмендеуі мүмкін. Алайда жүргізуші автокөліктің қайда тұратынын, қаншалықты жиі қолданылатынын және қандай зақымдардың ықтималдығы жоғары екенін алдын ала бағалауы қажет.
Әйнек, фара және дөңгелекті бөлек сақтандыруға болады
Автокөліктің ең осал бөлшектері қосымша опцияларға енгізілген. Әйнекті, айнаны, фараны, шинаны және дөңгелек дискілерін жеке сақтандыруға болады.
Осы элементтердің бірі зақымданса, компания автокөлікте басқа зақымдардың бар-жоғына қарамастан, тиісті тәуекел бойынша жеке төлем жасайды. Мұндай опция тасжолда жиі жүретін немесе көлігін ашық тұраққа қоятын жүргізушілерге тиімді болуы мүмкін, деп хабарлайды DKNews.kz.
0%-дан 5%-ға дейінгі франшиза бағаға қалай әсер етеді
Полистің негізгі параметрлерінің бірі — франшиза. Бұл сақтандыру компаниясы өтемақыдан ұстап қалатын және автокөлік иесі өзі төлейтін шығын бөлігі.
КАСКО PRO бағдарламасында 0%-дан 5%-ға дейінгі франшиза қарастырылған. Франшиза мөлшері жоғарылаған сайын полис арзандайды, бірақ жөндеу шығынының көбірек бөлігін клиент өзі өтеуге тиіс.
0% франшиза таңдалса, сақтандыру құны ең жоғары болады. Оны төмендету үшін «Екінші сақтандыру жағдайынан бастап 250 000 теңге ұстап қалу» опциясын қосуға болады.
Алғашқы сақтандыру жағдайында клиентке өтемақы толық төленеді. Екінші және одан кейінгі әрбір жағдайда төлемнен 250 мың теңге шегеріледі.
Кінәсіз жүргізушіден франшиза ұсталмайды
Клиент 0%-дан жоғары франшизаны таңдаса, компания оның мөлшерін сақтандыру төлемінен шегереді. Бірақ жүргізуші жол-көлік оқиғасына кінәлі болмаған жағдайда франшизаны қолданбау опциясын қоса алады.
Клиенттің кінәсіз екені расталса, өтемақы толық көлемде төленеді. Егер жол апатына полис иесінің өзі кінәлі болса, франшиза сомасы төлемнен шегеріледі.
Бұл опция полис бағасын сәл көтереді. Дегенмен оның құны франшизасыз сақтандырудан төмен болады.
Жүргізуші ТҚС-ты өзі таңдай алады
Конструктордың тағы бір параметрі — сақтандыру өтемақысын есептеу тәсілі. Бұл таңдау жөндеу құнын кім анықтайтынына және ақшаның кімге аударылатынына әсер етеді.
Бірінші нұсқада жүргізуші техникалық қызмет көрсету станциясын өзі таңдайды. ТҚС зақымды бағалайды, ал сақтандыру компаниясы төлемді жөндеу станциясына тікелей аударады.
Екінші нұсқада ТҚС-ты сақтандыру компаниясы ұсынады. Бұл жағдайда да өтемақы жөндеу жүргізетін станцияға аударылады.
Алғашқы екі нұсқада автокөліктің амортизациялық тозуы есепке алынбайды.
Үшінші нұсқада көлік иесі ақшалай төлем алады. Зақым мөлшерін сақтандыру компаниясы автокөліктің амортизациялық тозуын ескере отырып анықтайды.
Бұл — автокөлік иесі үшін принципті таңдау. Ескі көлікті тозуын есепке алмай жөндеу тиімді болуы мүмкін, ал тікелей ақшалай төлем қаражатты пайдалану еркіндігін береді.
Көлікті белгіленген сомаға сақтандыруға болады
КАСКО PRO автокөліктің нарықтық құнына қарамастан, нақты сақтандыру лимитін таңдауға мүмкіндік береді. Үш нұсқа бар: 500 мың, 750 мың және 1 млн теңге.
Жол-көлік оқиғасы кезінде компания нақты келтірілген залалды таңдалған лимит шегінде өтейді. Мысалы, жөндеу құны 600 мың теңге болып, полис 750 мың теңгеге рәсімделсе, басқа талаптар сақталған жағдайда шығын толық жабылуы мүмкін.
Егер жөндеу құны таңдалған лимиттен асып кетсе, айырмасын автокөлік иесі өзі төлейді. Бұл нұсқа көліктің толық құнын емес, күнделікті кездесетін зақымдарды сақтандырғысы келетін жүргізушілерге арналған.
Компания белгіленген сома бойынша пропорциялық есеп қолданылмайтынын мәлімдеді. Өтемақы көліктің толық нарықтық құнына сақтандырылмағанына байланысты азайтылмайды және таңдалған лимитпен ғана шектеледі.
Қазақстаннан бүкіл әлемге дейін
Автокөлік иесі полистің қолданылу аумағын да өзі белгілейді. Сақтандыру тек Қазақстанда, Қазақстан мен Ресейде, Қазақстан мен Қырғызстанда немесе бүкіл әлемде қолданылуы мүмкін.
Бұл мүмкіндік шекарадан жиі өтетін жүргізушілер үшін өзекті. Полисті рәсімдер алдында шетелдегі сақтандыру жағдайын тіркеу тәртібін және қажетті құжаттар тізімін тексерген жөн.
Полисті бес минутта рәсімдеуге болады
КАСКО PRO полисі Freedom SuperApp арқылы рәсімделеді. Компанияның мәліметінше, бұл шамамен бес минут уақыт алады.
Сақтандыру құнының бір бөлігі клиентке Freedom валютасымен кешбэк ретінде қайтарылады. Полистің соңғы бағасы автокөлікке, тәуекелдерге, франшизаға, өтемақы тәсіліне және сақтандыру аумағына байланысты есептеледі.
«Жаңа КАСКО PRO полисінің басты артықшылығы - жүргізуші өз автокөлігін нақты қандай тәуекелдерден қорғағысы келетінін өзі таңдай алады. Әр жүргізуші өз көлігінің ерекшелігі мен жүргізу мәнерін жақсы біледі. Сондықтан өзіне қажет тәуекелдерді ғана қамтитын сақтандыру пакетін таңдай алады. Бұл әрі клиент үшін тиімді, өйткені ол өзіне қажет опцияларды ғана таңдайды, әрі сақтандыру компаниясы үшін де қолайлы. Себебі компания нақты клиент бойынша қандай тәуекелдердің орын алуы мүмкін екенін алдын ала бағалап, ықтимал залалды өтеуге дайын болады», - деді «Freedom Insurance» СК» АҚ» басқарма төрағасы Азамат Керімбаев.
Конструктор автосақтандыруды икемдірек етеді, бірақ шешімнің бір бөлігін клиенттің өзіне қалдырады. Сондықтан полис сатып аларда бағаны ғана емес, франшизаны, төлем лимитін, жөндеу құнын есептеу тәсілін және сақтандырудан тыс жағдайларды да салыстыру қажет.
