Екінші дүниежүзілік соғысының ардагері Владимир Дмитриевич Белозеров 101 жасқа толды.
Осыған орай майдангерді Алматы қаласы Қорғаныс істері жөніндегі департаментінің басшылығы мен Бостандық ауданы әкімдігі өкілдері арнайы барып құттықтады, деп хабарлайды DKNews.kz.
Қорғаныс министрінің атынан ардагерге құттықтау хат пен естелік сыйлықтар табысталды. Әскери қызметшілер ізгі тілектерін айтып, әскери оркестр соғыс жылдарындағы әндерді орындады.
Майдан жолы
Владимир Белозеров 1925 жылғы 3 тамызда Шымкент қаласында дүниеге келген.
Соғыс басталған кезде теміржол училищесінде білім алып жүрген. 1943 жылы Қызыл армия қатарына шақырылып, Барнаул жаяу әскер училищесін тәмамдаған соң мерзімінен бұрын майданға аттанды.
Ол 3-Украина майданының 92-гвардиялық атқыштар дивизиясы құрамындағы 280-атқыштар полкінде шайқасты.
Алғашқы ұрысын Украина жерінде қабылдап, Днепрден өту кезінде басынан ауыр жарақат алды. Ұзақ уақыт емделгеннен кейін денсаулығына байланысты әскери қызметтен босатылды.
Ерлігі үшін Қызыл Жұлдыз орденімен және II дәрежелі Отан соғысы орденімен марапатталды.
Соғыстан кейінгі еңбек жолы
Соғыстан кейін Владимир Белозеров еңбек жолын құрылыс саласына арнады.
Мәскеу индустриялық институтын тәмамдап, Алматыдағы құрылыс материалдары комбинатының өндірістік цехтарының бірін ширек ғасырдан астам басқарды. Оның еңбегі қала өнеркәсібінің дамуына айтарлықтай үлес қосты.
101 жаста да белсенді
Құрметті жасына қарамастан, ардагер әлі күнге дейін белсенді өмір салтын ұстанады.
Ол күн сайын дене жаттығуларын жасап, серуендейді, шахмат ойнайды. Жақындары мен таныстары оның сергек ойы мен өмірге деген құштарлығына тәнті.
Әскери қызметшілер, ардагерлер ұйымдары және жастар Владимир Белозеровқа тұрақты түрде барып, құрмет көрсетіп келеді.
Майдангердің өмір жолы – ерлік пен қайсарлықтың, Отанға адал қызмет етудің жарқын үлгісі.
