Volkswagen Қазақстан нарығына ресми түрде қадам басты. Компания елімізде сатылатын алғашқы автокөліктер партиясын өндірістік алаңынан жөнелтті.
Бұл – Orbis Auto мен Volkswagen China арасында жасалған келісімнің нақты жүзеге аса бастағанын білдіретін алғашқы маңызды кезең, деп хабарлайды DKNews.kz.
Алғашқы жеткізілімге бірден бірнеше сегменттегі автокөліктер енгізілген. Олардың қатарында бизнес-классқа жататын Volkswagen PASSAT пен соңғы буындағы Volkswagen TAYRON кроссовері бар. Компания бұл жолы нарықты бір ғана модельмен сынап көрмей, толыққанды сатылымға дайындықты таңдаған.
Алғашқы партияда қандай көліктер бар?
Қазақстанға жөнелтілген алғашқы партия Volkswagen және JETTA брендтерінің түрлі санаттағы модельдерін қамтиды. Ал ұлттық таныстырылым кезінде қазақстандықтарға брендтердің толық модельдік қатары ұсынылады.
Volkswagen өкілдерінің айтуынша, бұл компанияның Қазақстандағы ұзақмерзімді стратегиясының алғашқы қадамы ғана.
«Алғашқы автокөліктер жолға шықты. Бұл бірнеше айға созылған дайындықтың жақын арада қазақстандық тұтынушылардың қолына жететін нақты өнімге айналған сәті. Біз сатылымды бір ғана модельден бастап, нарықты абайлап сынап көріп отырған жоқпыз. Алғашқы партияның өзі әртүрлі кластағы автокөліктерден құралған және толыққанды сатылымды бастауға арналған. Бұл біздің команда үшін маңызды белес әрі Volkswagen мен JETTA брендтерінің Қазақстандағы үлкен жолының бастауы», – деді Volkswagen-нің Қазақстандағы дистрибуция жөніндегі директоры Роман Кузьмин.
Қазақстан үшін арнайы бейімделген
Компанияның мәліметінше, Қазақстанға жеткізілетін автокөліктер жергілікті климат пен жол жағдайларын ескере отырып дайындалған.
Бейімдеу бірнеше негізгі бағытты қамтыған:
- күштік агрегаттар;
- электрондық жүйелер;
- аспа жүйесі;
- шанақ пен астыңғы бөліктің қорғанысы;
- мультимедиа және бағдарламалық қамтамасыз ету.
Мұндай өзгерістер көліктердің еліміздің ауа райы мен жол инфрақұрылымына жақсырақ бейімделуіне мүмкіндік береді.
Көліктер Қазақстанға қашан жетеді?
Өндірістік алаңнан Қазақстанға дейінгі логистикалық бағыттың ұзындығы шамамен 3 500 шақырымды құрайды.
Елімізге жеткізілгеннен кейін барлық автокөлік ресми дилерлік орталықтарға жіберіліп, сатылым алдындағы дайындықтан өтеді.
Бағасы қашан белгілі болады?
Volkswagen Қазақстандағы модельдік қатар, бағалар, жабдықталу нұсқалары және ресми дилерлік желі туралы толық ақпаратты 2026 жылғы тамыз айында өтетін Volkswagen және JETTA брендтерінің ұлттық тұсаукесері кезінде жариялайтынын хабарлады.
Осылайша, қазақстандық автонарықта тағы бір ірі халықаралық брендтің ресми қатысуы басталып отыр. Ал алғашқы жеткізілімнің бірден бірнеше модельден тұруы компанияның Қазақстан нарығына ұзақмерзімді жоспармен келгенін аңғартады.
