Freedom білім саласындағы орнын күшейтті.
Freedom Holding Corp. қазақстандық Bilim Group EdTech-компаниясының үлесін сатып алып, «Bilim Group LTD» ЖШС-нің негізгі қатысушысы атанды. Мәмілені Қазақстанның Бәсекелестікті қорғау және дамыту агенттігі мақұлдады, деп хабарлайды DKNews.kz.
Тараптар үлес мөлшерін, мәміле құнын және оның құрылымын жарияламады. Сондықтан Bilim Group толық сатып алынды немесе Freedom бақылау пакетіне ие болды деп айтуға негіз жоқ.
Алайда стратегиялық бағыт анық. Freedom білім беру технологияларын дамытып, EdTech сервистерін SuperApp экожүйесіне енгізуді және OpenAI-мен ынтымақтастықты кеңейтуді жоспарлап отыр.
Bilim Group үлесі Freedom-ға не береді
Bilim Group білім беру технологиялары нарығында 2011 жылдан бері жұмыс істейді. Баспасөз хабарламасында ол Қазақстан мен Орталық Азиядағы ең ірі EdTech-компания ретінде көрсетілген.
Компанияның экожүйесі цифрлық оқу контентін, электрондық кітапханалар мен тьюторинг сервистерін біріктіреді. Оған білім беру үдерістерін автоматтандыру, кадрлық және қаржылық есеп жүргізуге арналған шешімдер де кіреді.
Басты актив — аудитория.
Bilim Group сервистерін күніне шамамен 1 млн бірегей пайдаланушы қолданады. Freedom осы мәміле арқылы жеке платформаны нөлден құрмай-ақ, білім беру нарығындағы орнын жылдам күшейте алады.
AI және SuperApp: Bilim Group қалай дамиды
Freedom зерттеулерге, жаңа білім беру контентіне және заманауи әдістемелерге инвестиция салуды жоспарлап отыр. Негізгі бағыттардың бірі — жасанды интеллект пен білім беру аналитикасын енгізу.
AI құралдары педагогтарға оқушылардың нәтижелерін талдауға, қажетті материалдарды таңдауға және жеке оқу траекторияларын құруға көмектесуі тиіс.
Компаниялар оқытуды дараландыру технологияларын да дамытпақ. Жүйе барлық оқушыға бірдей тапсырма ұсынудың орнына, әр баланың білім деңгейін, оқу қарқынын және қажеттіліктерін ескере алады.
Келесі қадам — EdTech сервистерін Freedom SuperApp экожүйесіне енгізу. Қандай өнімдер бірінші қосылатыны және олардың жаппай іске қосылу мерзімі әзірге белгісіз.
Freedom Holding Corp. компаниясының бас атқарушы директоры Тимур Турлов үлес сатып алуды стратегиялық қадам деп атады.
«Біз үшін бұл Қазақстан мен Орталық Азиядағы EdTech сервистерін ең озық технологиялар арқылы дамытуға бағытталған стратегиялық қадам болып отыр. Қаржылық және білім беру технологияларының синергиясы миллиондаған пайдаланушы үшін жаңа мүмкіндіктер ашып, қоғам үшін маңызды әрі пайдалы сервистерді ыңғайлы форматта және тегін ұсынуға мүмкіндік береді деп сенеміз. Осы бағыт аясында біз қол қойылған келісім негізінде OpenAI компаниясымен ынтымақтастықты дамытуды жоспарлап отырмыз. Сондай-ақ EdTech сервистерін SuperApp экожүйесіне интеграциялап, ең заманауи қазақстандық өнімдер, әзірлемелер және халықаралық серіктестіктердің мүмкіндіктерін пайдалана отырып, сапалы электрондық білім беру қызметтерімен қамтылатын пайдаланушылар санын кезең-кезеңімен арттыруды көздейміз.».
OpenAI-дың мәмілеге қандай қатысы бар
Freedom мен Bilim Group бірлескен білім беру жобаларын мәмілеге дейін бастаған. Негізгі бағыттардың бірі ChatGPT Edu бағдарламасымен байланысты.
2025 жылғы қарашада Вашингтонда Қазақстанның Ғылым және жоғары білім министрлігі, Жасанды интеллект және цифрлық даму министрлігі, OpenAI және Freedom Holding Corp. өзара түсіністік туралы меморандумға қол қойды.
Келісім аясында Қазақстанның 160 мыңнан астам педагогы BilimClass платформасы арқылы ChatGPT Edu-ға қол жеткізді. Бағдарламаның білім беруге арналған нұсқасында конфиденциалдылық пен деректерді қорғау шаралары күшейтілген.
Енді Freedom OpenAI-мен ынтымақтастықты кеңейтпек. Жаңа жобалардың егжей-тегжейі ашылған жоқ, бірақ холдинг оларды EdTech сервистерін дамыту және SuperApp экожүйесіне енгізумен байланыстырады.
Серіктестік үлес сатып алынғанға дейін басталды
Freedom мен Bilim Group компания қатысушыларының құрамы өзгермей тұрып-ақ бірлесіп жұмыс істеген. Жобалардың бірі білім беру мен оқушыларды қаржылай ынталандыруды біріктірді.
Freedom Bank-пен бірлескен жоба арқылы қазақстандық оқушылар жоғары оқу үлгерімі үшін сыйақы ала алады. Бұл бастама балалардың білімге деген ынтасын арттырумен қатар, қаржылық сауаттылық негіздерін түсіндіруге бағытталған.
Bilim Group негізін қалаушы Рауан Кенжеханулы мәмілені көпжылдық серіктестіктің жалғасы деп бағалады.
«Бұл синергия – технологияларды дамыту жолындағы көпжылдық стратегиялық серіктестігіміздің заңды жалғасы. Бұл ынтымақтастық қазірдің өзінде елеулі нәтижелерін көрсетті. Freedom Bank-пен бірлескен жобалардың арқасында қазақстандық оқушылар оқу үлгеріміндегі үздік жетістіктері үшін сыйақы ала алады. Бұл олардың білім алуға деген ынтасын арттырып қана қоймай, сондай-ақ жеке қаржылық сауаттылығын дамытуға да ықпал етеді. Біз құзыреттер мен ресурстарды біріктіру инновацияларды жылдамырақ әрі тиімдірек енгізуге, сондай-ақ цифрлық білім беру шешімдерінің орнықты дамуын қамтамасыз етуге мүмкіндік беретініне сенімдіміз. Бұл қазіргі әлемде адам капиталының өсіміне негіз болатын маңызды фактор.».
Freedom-ға EdTech не үшін қажет
Bilim Group үлесін сатып алу Freedom-ның цифрлық экожүйесін кеңейтеді. Холдинг қазір қаржы, телекоммуникация, электрондық сауда, әуе билеттері мен мәдени және спорттық іс-шаралар билеттерін онлайн сату бағыттарында жұмыс істейді.
Білім беру бағыты холдингке күнделікті аудиториясы бар әлеуметтік маңызы жоғары өнім қосады. Freedom сонымен бірге AI технологияларын енгізуге және қазақстандық IT-шешімдерді Орталық Азия нарығына шығаруға арналған алаң алады.
Bilim Group ірі жария холдингтің қаржылық және технологиялық ресурстарына қол жеткізеді. Бұл жаңа өнімдерді әзірлеуді және оларды өңірлік нарықтарға шығаруды жеделдетуі мүмкін.
